Gabinete Wever Croes a regala CITGO 300 miyon florin

Ora cu Gabinete Wever Croes a asumi maneho di e pais, Prome Minister Evelyn Wever Croes a insisti cu “e hende lo ta central den su maneho”, pero despues di tres aña y mey di mal gobernacion, pueblo mes a ripara cu e unico hendenan central pa Gobierno di MEP, tabata famia y amigonan hunto cu sponsornan.

T’e hendeanan aki a gosa di e tiki bonansa cu e Gobierno di Evelyn a produci ya cu pueblo mes a wordo asota pa cantidad di medida, caminda a kita mas ci 270 miyon for di cartera di pueblo y for di e sector comercial, sin cu a duna pueblo un alivio a cambio.

Prome Minister Evelyn a bira conoci como un mandatario cu ta lider den gañamento, cu ta papia un cos y haci otro cos y fuera di e comete un crimen dor di aumenta costo di bida sin misericordia, su Gobierno den ultimo simannan, a dicidi di introduci reduccion di gasto pa loke ta AZV cu consecuencia cu pueblo no por haya medicamentonan cu semper nan tabata haya pa alivia nan malestarnan.

Hulanda den forma bon cla a mustra cu reduccion di gasto den cuido medico cu 5 miyon pa luna pa un total di 60 miyon pa aña, ta un idea y vision di Prome Minister Evelyn Wever Croes, a pesar cu el a trata di  culpa Gobierno Hulandes y Seccretario di Estado, Raymond Knops di esaki.

Desde prome di april ultimo, tin tur bario, practicamente den tur famia, por mira con hendenan a wordo sorprendi pa un medida asina cruel, caminda si nan tin mester di un remedi pa alivia cualkier dolor of malesa cu nan ta padece di dje, ta nan mes tin cu paga esaki cu placa for di nan cartera, un cartera cu en realidad Gobierno di MEP a ranca practicamente tur placa for di den dje.

Prome Minister ainda no a bin dilanti y acepta e eror garofal aki cu el a comete, un tipo di crimen contra di bienestar di pueblo, pero ta presta su mes pa cana cu kelki di champaña den ImSam pa habri algun kamber caminda hendenan malo por wordo trata.

Ta mesun hendenan cu el a nenga di subsidia nan remedi, mesun hendenan cu el a neglisha por complete, pero kier celebra esaki mescos cu ta gran logro, di su Gobierno.

CITGO

Sinembargo aña pasa Prome Minister a yama un conferencia di prensa den cual el e felicita pueblo, ya cu el a logra di anula e contract cu Gobierno tabatin cu e compania di petroleo, CITGO, caminda el a libera e compania aki di un suma di 300 miyon florin.

Un suma cu CITGO mester a paga Aruba si den dado caso nan no cumpli cu e contract, loke no a sosode, pero sin haya placa pa pueblo, Evelyn a hunga grandi, cu el a recupera terenonan di e refineria y ta algo cu su persona y su partido a haya un logro grandi.

Sinembargo awor cu pueblo ta sinti efecto di e crimen di remedi cu  su persona a acorda cu Hulanda pa reduccion di costo medico, ta resalta e hecho con bon curason Evelyn ta pa un compania extranhero, pero no a pensa riba bienestar di su pueblo.

Ora cu analisa e sufrimento di un pueblo pa falta di su remedinan, tin cu pensa riba e suma di placa cu Gobierno di MEP a duna e compania petrolero aki, ya cu en realidad e 300 miyon aki lo por a cubri CINCO aña di costo di remedi pa un pueblo cu tin necesidad di esaki, ya cu ta tempo dificil, tempo di poco entrada, tempo di poco trabou y tempo di poco economia.

Pa luna Gobierno tin cu reduci 5 miyon di gasto di AZV y pa aña esaki ta monta na 60 miyon y sin duda e 300 miyon cu a duna CITGO, por a cubri remedi pa pueblo den necesidad p’asina nan sobrebibi e tempo dificil actual.