Gasolin a bolbe subi barbaramente, Mientras Gabinete Wever Croes a priminti y sigura pueblo gasolin mas barata

“Explora e posibilidad di importa gasoline di paisnan den region, caminda prijs di gasoline ta mucho mas abou cu aki na Aruba” ta loke e programa di gobernacion 2017-2021 di partido MEP  pero ayera ora cu pa di tantisimo bes prijs di gasoline a bolbe subi, ta otro promesa falso di un Gobierno cu nunca a cumpli cu su promesanan.

For di ayera mainta por a scucha otro suspiro di desesperacion den pueblo, ya cu fuera cu pueblo mes tin cu paga pa su remedinan awor, e aumento di prijs di gasolin ta crea ainda mas problema financiero pa hopi famia.

Awe un ciudadano cu tin e custumber di hinca 50 florin den su tanki pa wanta un siman tres aña pasa, awor e suma di placa aki ta igual cu e tank 25 florin antes, pues ta mita di loke e tabata haya, awor e por hinca den tanki di e auto.

Algo increibel cu ta otro aporte mas n’e peso di desesperacion di un pueblo cu a conoce un presion grandi economicamente, implementa pa un Gobierno cu no tabatin vision pa guia e pais.

No solamente gasoline, pero ora cu analisa e programa di gobernacion di partido MEP, cu cual nan a engaña henter pueblo, tin un parti pa loke ta otro promesa falso pa reduci prijs di awa y coriente cu ta bisa lo siguiente: “MEP mester acelera y adelanta e proyecto di gasoducto, presenta pa Gobierno di MEP na 2009 pa WEB y e refineria di Aruba, cu ainda mester a habri, p’asina haya gas natural for di e pos di REPSOL cu ta solamente 50 kilometer leu di Aruba”

Esaki ta mesun plan cu e actual Minister demisionario di Asuntonan Social y di Labor, Glenbert Croes a priminti pueblo cu su Gobierno lo trece un pipa di cas pa baha awa y coriente y aliva e peso economico pa pueblo.

Nunca mas a tende di e plan aki, nunca mas Gabinete Wever Croes a menciona of duna sikiera un indicacion chikito cu nan lo ta haciendo un esfuerso pa logra esaki y asina reduci prijs di awe y coriente manera cu a priminti pueblo di lo haci.

Pa colmo mientras cu den e programa di gobernacion aki MEP a papia di reapertura di e refineria, t’e propio Prome Minister Evelyn Wever Croes a pidi bufete di abogado di su famia, pa termina e contact cu CITGO y riba dje permiti e compania Mericano aki bandona Aruba sin paga e suma di 300 miyon florin pa kiebro di contract firma.

“Cu esaki MEP lo logra reduci costo di bida, ya cu energia alternativo ta keda riba atende di Gobierno semper y cuando cu esaki ta na beneficio di pueblo y sin consecuencia negativo p’e medio ambiente.”

Esaki tambe tabata otro promesa grandi di partido MEP na 2017, pero despues di a baha su Gobierno, partido MEP nunca a reduci costo di bida pa pueblo, al contrario a converti su mes den un di e Gobiernonan di e pais aki, cu mas a percura pa aumento di costo di bida, debi na cantidad di medida cu a suta pueblo cune.

Ainda tin mas medida na caminda, sigur un BTW cu ta nifica cu tur hende cu cumpra algo, tin cu paga impuesto adicial fuera di BBO, riba e compra cu nan haci.

Aumento di prijs di gasolin simplemente ta otro sota riba sotanan caba cu Gobierno di MEP a impone contra pueblo di Aruba cu ta practicamente hogando den un crisis nunca bisto, pa gran parti pa mal maneho di Gabinete Wever Croes, pero tambe p’e pandemia cu tin henter mundo den su gara.