Inicio lento di turismo crucero pa Aruba

Manera nos tur por a ripara ta cu e industria di crucero a paralisa desde inicio di e pandemia aña pasa na maart. Anuncio cu a wordo haci recientemente ta cu Aruba ta den e itinerarionan di parti di Celebrity Cruise Lines cu lo re-inicia servicio entrante juni awor. Sinembargo ainda no tin fecha concreto riba re-inicio di operacion desde e puertonan mas importante p’e region Caribense, esta e puertonan den Sur di Florida.

Pa loke t’e perspectivanan, e mesun categoria di proyeccionan cu ta wordo uza e aña aki pa e turismo cu ta yega Aruba cu avion, ta wordo uza pa turismo crucero cu ta e tres tipo di proyeccion: ‘Conservativo’, ‘cautelosamente optimista’ y ‘optimista’.

N’e momentonan aki nos destinacion ta spera entre 55 mil pa 150 mil bishitantenan crucero p’e aña aki. Esaki ta pone cu nos ta den e cuadro conservativo pa turismo crucero pa 2021. E itinerario cu ta inicia na juni tin como homeport St. Maarten dus asina por wak cu companianan crucero ta coopera den diferente region mundial incluso nan ta reanuda servicionan den e region Caribense. Esaki nan a haci na Asia caba, como tambe na Israel, pero nan ta sali nabega e ora for di otro puertonan cu no ta puertonan Mericano. Pues e parti di CDC su anuncio ta hopi importante pa reanuda servicionan for di puerto Mericano y for di unda Aruba ta haya mayoria di su bishitantenan crucero.

A.T.A. den colaboracion cu Aruba Ports Authority ta sigui traha riba mas posibel adicion p’e lunanan durante e temporada di herfst entre otro cu Royal Caribbean Cruise Lines y Norwegian Cruise Lines. Recien tabatin diferente reunion cu a tuma lugar cu diferente linea crucero y speransa ta cu por anuncia cruceronan adicional cu tambe por tin Aruba inclui den nan itinerario. Awor e enfoke ta riba finalisa protocolnan pa cu turismo crucero y por mira tambe cu di parti di Centers for Disease Control & Prevention (CDC) di Merca a indica cu nan ta poniendo mas atencion riba e protocolnan pa cu e industria specifico aki.

Ta bon pa recorda cu e industria di crucero ta pendiente pa CDC aproba e recomendacionnan di e protocolnan relaciona cu Covid-19 pa barconan di crucero por reanuda operacion desde puertonan den teritorio Mericano.

Localmente Aruba tambe ta preparando pa reanudacion di yegada di turismo crucero y dialogonan ta andando entre A.T.A., Aruba Ports Authority y Ministerio di Turismo cu tur esnan cu ta forma parti di e industria crucero na Aruba.

E lunanan benidero ta wordo uza pa prepara debidamente p’e prome bishita crucero cu ta inclui huespednan y tripulacion cu ta riba e barco cu ta completamente vacuna. Ta trahando riba dos posibel otro opcion pa temporada di herfst cu ta lunanan unda nos destinacion normalmente no ta haya hopi bishita crucero pues esaki ta un reinicio pa nos por sigui cu e recuperacion di e industria den un forma gradual.