Jarissa Dubero, candidato nobo di AVP

“Ami ta un mama. Ami ta un maestra y ami tin hopi ex-studiante cu mester a lucha hopi duro mes pa caba scol y mucho hopi cu a pesar di nan lucha, no a logra caba scol. E situcion den enseñansa aworaki ta mas preocupante cu nunca antes.

Nos no por laga e situacion sigui bay fo’i man. Nos tin cu cambia e situacion den enseñansa awor, prome cu ta laat!”

Cu e palabranan inpactante aki señora Jarissa Dubero, juffrouw Ja, a introduci su mes diamars anochi den Cas di Partido, como candidato pa eleccion di 25 di juni awor, riba lista di partido AVP.

‘Juffrouw Ja’ no a sconde e frustracion cu e ta comparti cu su coleganan maestro den enseñansa, pa motibo di e maneho di e Minister actual. El a menciona cu e ambiente di trabou a bira asina malo den e ultimo añanan, cu tin maestronan hoben cu ta puntra pakico nan a bira maestro di scol, si nan no ta haya sosten y oido di e Minister di Enseñansa y e Gobierno di Aruba pa educa nos muchanan. E tabata un testimonio cu a gara atencion di tur hende y cu sigur lo haya continuacion durante y despues di e campaña pa eleccion. Sin duda e presentacion di Jarissa Dubero a capta nos atencion!

KEN TA JARISSA DUBERO?

Jarissa Dubero ta un juffrouw di scol secundario hopi stima. Su nomber ta Jarissa Fabiana Dubero, cariñosamente  yama JA of juf. JA. Juffrouw Jarissa tin 16 aña ta eherce e bunita trabou di maestra na diferente scol secundario.

El a caba su Bachelor den e materia di ‘BeeldVorm & Kunst’ na Hulanda. E ta un materia nobo cu ta ensera practica di diferente forma di arte. E forma cu juffrouw Jarissa ta duna su lesnan y su relacion cu su studiantenan a haci’e un maestra hopi stima y respeta.

Su mision ta pa trece e confiansa perdi bek entre Minister, sindicato, fundacion-, departamentonan- y maestronan. E forma cu e kier logra esey ta dor di stimula dialogo den tur sector y na tur nivel di enseñansa. Su vision ta di un Aruba cu enseñansa bon cordina for di peuter/creche te na HBO/educacion profesional y superior.

Tambe e ta kere cu enseñansa mester ta disponibel pa yuda hende siña cosnan nobo durante henter nan bida. Esey no ta nifica cu nan mester bay scol henter nan bida, pero si cu nan ta sigui siña y desaroya nan mes pa nan keda envolvi den comunidad y capaz di yuda nan mes den tur situacion di bida.

CAMPAÑA, WEBSITE Y COMPETENCIA

Jarissa Dubero su manera di campaña p’e eleccion ta diferente. Jarissa ta sigui educa tur hende. Tambe den campaña. Riba su website por sigui diferente workshop informativo manera splicacion di diferente topico di nos politica, con pa anda cu budget y mas. Riba e website tin un competencia hopi creativo pa Aruba unda bo por participa y gana premio super bon.

DICON A SCOHE PA AVP?

Juff Jarissa a scoge pa AVP p’e partido su trayectoria den historia di nos pais y p’e bon puntonan di enfoke den su programa nobo pa gobernacion di nos pais awor aki. Puntonan importante manera: Rescata y renoba ECONOMIA, rescata y renoba ENSEÑANSA, rescate di nos CUIDO MEDICO y fortifica nos RED SOCIAL.

Y masha importante, e forma di goberna den DIALOGO y HARMONIA cu ciudadanonan,  organisacion y gremionan den nos comunidad.

Por haya sa mas di Jarissa Dubero y sigui su campaña dor di subi un di e rednan social aki: Su website www.Juf.Ja.com , su pagina di Facebook FB Juf. Ja of su pagina di Instagram insta juf.ja

Pronto lo por vota pa Jarissa Dubero riba lista di AVP!