Keho p’e forma di campaña y posicion di Gobierno y Crisis Team Covid-19

Lider di UPP,Booshi Wever a acerca Evelyn Wever Croes como Prome Ministro di Aruba, pero tambe como e persona cu ta lidera e Crisis Team Covid-19, p’asina atende bo persona riba e desaroyo di e ultimo dianan aki, particularmente despues cu a tene un reunion di Comison di Eleccion di KPA, p’asina atende cu reglanan cu lo tin p’e periodo di campaña 2021.

Dicho reunion a tuma lugar dia 9 di april y nos di UPP por a comprende cu e mensahe prinicipal cu a sali dilanti ta cu no por campaña na cas. Esaki a wordo ripiti atrobe den conferencia di prensa di Gobierno dia 10 di april ultimo.

UPP por a constata cu den e ultimo dianan aki cu particularmente e partidonan grandi aki, no ta cumpli cu e regla aki y ta sigui campaña mescos cu nada no a pasa.

A mustra riba e situacion cu nos ruman isla Corsou ta pasa aden y obviamente e Crisis Team no ta desea pa Aruba yega den e mesun situacion aki. Pero UPP por constata cu tanto e partido grandi di oposicion como e partido grandi cu ta sostene bo Gobierno actualmente, no ta cumpli cu loke kier wordo imponi aki.

Pa UPP ta sumamente importante pa nos haya sa pronunciacion di bo persona como Prome Minister di Aruba y tambe lider di e Crisis Team cu ta atende cu maneho riba e asunto di pandemia Covid-19, riba henter e aspecto aki di campaña 2021.

Partidonan chikito por lo general ta wordo limita caba pa un sistema electoral anticua y defectivo, fondonan pa por haci campaña, disponibilidad di “zendtijd” via nos planta nacional di television cu ta wordo maneha p’e partido den Gobierno di turno y awor pa reglanan pa contene plamamento di Covid, mientras cu particularmente e partidonan grandi no ta atene nan mes na esaki, segun Booshi Wever.

UPP ta spera di haya un reaccion pronto, prome cu e siguiente reunion di Cuerpo Policial, p’asina UPP fiha su posicion y postura riba e asunto aki. Nos por mira caba con otro partidonan a indica cu nan tampoco lo cumpli cu e reglanan aki di campaña cas pa cas.

Como forma di protesta UPP ta dirigi e carta aki na tanto Parlamento, partidonan politico, demas gremio y instancianan y tambe na prensa. Adhunto UPP a manda algun potret y video pa demostra nan keho, segun Candelario A.S.D. Wever.