Partido PPA ta presenta lider nobo awe tardi

Contrario na ultimo eleccionnan cu partido PPA a participa na dje, pa eleccion 2021 di dia 25 di juni venidero, e partido oranje a dicidi di haci un asina yama ‘re-lansamento’ di e partido den un version nobo, despues cu Benny Nisbet a fayece algun luna atras.

Pa algun dia caba por a scucha diferente speculacion riba futuro di un di e partidonan mas bieu den e historia politico di Aruba caminda  den ultimo dianan, esta desde fin di siman, tabatin hopi rumor kende lo bay dirigi e partido of si esaki lo participa den e proceso electoral di luna di juni venidero.

Siman pasa AWEMainta ya caba a publica un articulo referente n’esaki despues di a haya informacion cu tin preparacionnan tumando lugar, entre otro cu trahamento di sticker caminda inicialmetne e nomber di Lisette Malmberg a cay y cu e partido lo tin hopi dama riba e lista.

Den fin di siman  rumor a cuminsa circula despues di  e ‘gimmick’ politico di Marisol Lopez Tromp, kende lo a wordo sorprendi cu bishita di un grupo di su votadornan, kendenan lo a entrega un manifesto den cual nan ta haci un apelacion riba su persona, pa participa den e proceso electoral.

Aki mesora a lanta e speculacion cu probablemente Marisol Lopez Tromp lo bay eleccion cu partido PPA mirando cu no tabatin tempo mas p’e lanta su propio organisacion politico, despues cu Evelyn Wever Croes a dicidi di baha su Gobierno y yama eleccion tres luna adelanta.

Pero nos tin entendi cu Marisol Lopez Tromp tin dos alternativa ainda, si e no bira lider di PPA, esta e ta buscando plataforma di un partido, cu ya a participa na eleccionnan anterior y/of hasta uni cu Booshi Wever. P’e fin di siman aki mester tin claridad di loke Marisol Lopez-Tromp lo haci.

Ayera mainta un invitacion di partido PPA a bay pa prensa local cu e invitacion pa un ceremonia caminda lo tene un ‘re-lansamento’ di e partido aki, cual conferencia lo tuma lugar pa 6’or awe tardi na Clavelstraat 5 na San Nicolas.

Algun ora despues a cuminsa circula potretnan di trabou cu ta ser hisa riba un bus grandi den cura di The Palm Tours,  cu e nomber di PPA grandi riba un bus cu a wordo gefliet oranje, confirmando e rumornan cu ta for di algun siman caba, Lisette Malmberg lo ta trahando riba stickernan p’e partido duna su sostenedornan.

Hecho ta cu e biaha aki PPA lo no forma un solo lista di PPA/UPP. UPP di politico Booshi Wever bai riba su propio forsa sperando cu e lista cu lo wordo presenta, lo por duna e partido representacion den Parlamento y posiblemente hasta lo por forma parti di un Gobierno di coalicion. Mester admiti cu UPP a hiba un oposicion pafor di Parlamento, cu a bin ta gana simpatia di hopi hende cu ta buscando un partido alternativa den proximo eleccion.

Tempo ta preta, no tin mucho espacio pa presenta un campaña cu lo por tabata mas efectivo, mientras cu ainda no tin indicacion si e partido, of esnan cu a dicidi di lanta e partido, lo a hinca un programa di gobernacion den otro, caminda e lo ta efectivo pa atende cu e situacion cu tin na Aruba actualmente.

Pa falta e tempo cortico cu tin pa forma un lista y presenta esaki na conseho supremo electoral, cu ta dia 7 di mei mas tarda, esaki a hinca hopi partido politico den un situacion caminda no por bay haci mucho mas na hinca un campaña realistico den otro.

Ta bin acerca e limitacionnan cu ta wordo impone  pa DVG y Gobierno relaciona cu e pandemia di Covid-19, cual tambe ta pisando hopi den e comunicacion cu partidonan lo kier tin pa hiba nan mensahe y programa na e pueblo votador.

Pues awe tardi partido PPA den un constelacion nobo y despues di varios decada bou liderasgo di Benny Nisbet den feliz memoria, e partido tradicional aki lo trata di sali for di profunidad cu el a cay den ultimo  35 añanan.