Sponsornan di AVP, doñonan y ex-Minister di AVP, actornan principal den caso di corrupcion

“Nos ta lamenta profundamente cu partido AVP den e caso di “Avestruz” ta trata na atacha credibilidad di e cadena hudicial. Den nan mecanismo di defensa nan ta trata na crea e percepcion cu ‘kinan lo ta trata di persecucion politico.

Esaki sigur no ta berdad y ta lamentabel cu ningun persona den AVP ta sali para p’e cadena hudicial. Nos por a wak un ex-Minister Benny Sevinger, kende a vocifera cu e ta inocente di tur cos, hopi emociona y ta trata na culpa mundo henter p’e hecho cu e ta sospechoso entre otro di soborno, estafa, labamento di placa, maluza su funcion y falsificacion di documento”, segun lider di fraccion di MEP, Rocco Tjon. 

EMBERGADURA DI CASO AVESTRUZ

Ta bon pa recorda pueblo cu Ministerio Publico a splica cu caso “Avestruz” ta trata un investigacion di con personanan a enrikeze nan mes pa otorgamento di tereno entre 2009-2017.

Y den e investigacion aki actual Parlamentario Benny Sevinger ta wordo sospecha pa estafa, maluza su funcion, soborno, labamento di placa y falsificacion di documento.

E encargonan contra sr. Benny Sevinger, ta trata otorgamento di por lo menos 82.157 meter cuadra di tereno contra proceduranan vigente. Pues ta hopi miyones di florin e organisacion aki a cobra pa terenonan di pueblo di Aruba.

MIKE EMAN DESESPERA

Aworaki cu Benny Sevinger lo mester responsabilisa su mes pa estafa, soborno, falsificacion di documento, labamento di placa y malhuzo di su funcion, tur bou tempo cu e tabata forma parti di Gabinete MIke Eman. Mike kier cuestiona ful e aparato Hudicial.

Pa colmo e ta evalua pa manda un carta pa Hulanda. Ta comosifuera cu Mike Eman no sa cu Landsrecherche ta wordo reforza pa RST (Hulanda). Ta comosifuera cu Mike Eman no sa cu Ministerio Publico ta wordo lidera pa un PG Hulandes, segun Rocco Tjon.

PA CONCLUI

Mescos cu Mike Eman a manipula pueblo cu apertura di CITGO, e KB pa mal gobernacion, falsificacion di logo di Central Bank y eliminacion di impuestonan aworaki e kier pinta ful e aparato hudicial malo.

Na mes lugar e kier tira tur culpa riba fraccion di MEP. Ora Rocco Tjon señala cosnan malo e ta trece esaki padilanti na instancianan concerni.

Y ni AVP, ni Mike Eman y ni Benny Sevinger no lo stop esaki dor di purba crea un storia cu ta persecucion politico, Rocco Tjon a laga sa.