Aruba Bank a scapa di un pago di 11.2 mion florin na Belasting

Diamars ultimo Corte di Husticia Comun a propiná Belastingdienst di Aruba un gòlpi monumental dictando un veredicto caminda a declará cu Gobierno no por cobra un Belasting di 11.2 mion florin serca Aruba Bank, pasobra Belastingdienst no a laga registrá un acto di prescripcion pa frena e periodo cu e belasting ta caducá.

E caso tin un historial di 14 aña den archivonan di Corte di Husticia primeramente na Aruba.

Promé biaha cu Belastingdienst a manda un aanslag pa Winstbelasting a rason di  Afl. 11.299.533,- tabata na aña 2003. Y e banco a reclamá pa pidi pa posponé e pago.

Nan a haña te 12 februari 2012 pa efectua e pago, mientras tabata bringa e caso den Corte.

Na aña 2012 Belastingdienst a manda recordatorio pa Aruba Bank cu nan a pendiente pa pago dje belasting riba aña 2003.

Aruba Bank a manda bisa Belastingdienst cu e belasting a caducá riba cual Belastingdienst a warda te dos aña na 2014 pa menasa cu beslag y a menasá di pone beslag pa pago di Winstbelasting riba tres aña cu a pasa.

Aruba Bank a apelá na Ontvanger y nan a sinta na mesa cu Belastingdienst pa regla pago di e belastingnan di añanan 2001 te cu 2010, pero no a regla riba aña 2003, pasobra Aruba Bank a reserva e derecho di bringa e caso te den maximo Corte di pais.

Riba e posibilidad pa atende un situacion asina tin mil teoria, pero esey ta keda un banda pa despues.

E caso a yega Corte Supremo cu a manda e caso bèk pa Corte di Husticia Comun na Còrsou cu a considerá cu e hecho cu Belastingdienst a pèrmiti posponé pago dje belasting, a frena e proceso, pero cu e ta válido.

Pero ta sosode cu un areglo pa posponé pago dje belasting no ta frena e proceso y cu te fechanan original di 2003 y 2012 ta conta y den tal caso e belasting a caducá.

Belastingdienst tabatin tur tempo di mundo pa cobra e belasting, pero no a ehercé su derecho y e belasting di 11.2 mion florin a caducá.

Belastingdienst tabatin 5 aña pa tuma medida pa activá e beslag, pero a keda sin haci esey y Gobierno no por reclamá cu e cos aki no ta husto cu nan ta pèrdè e placa.

Tapa nan mes negligencia y fayo cu e belasting a caducá y Corte a dicidi cu nan tin cu paga tur gasto di e proceso como e partido pèrdèdor.