Awor ta pretende cu mester tin mas respet pa Ministerio Publico

Tres miembro di fraccion di MEP den Parlamento, a reacciona riba e forma con partido AVP a cuestiona e maneho di Ministerio Publico den un conferencia di prensa diamars ultimo.

Manera ta conoci tanto lider di partido di AVP, Mike Eman como Parlamentario Benny Sevinger a cuestiona con un biaha mas, Ministerio Publico den pleno campaña, ta haci investigacion contra politiconan,  sigur p’e forma con esaki ta tumando lugar.

Lider di fraccion di MEP, Rocco Tjon a desmenti cu partido MEP tin algo di haber cu e investigacion, pero ta net su persona mas yega di scirbi carta pa Hulanda, pa financia un investigacion contra di Benny Sevinger y despues a cuestiona hasta cu esaki no a tuma lugar.

Ministerio Publico den un carta pa abogado David Kock, kende ta representante legal di Sevinger, a ser mustra cu ainda e caso aki ta den pleno investigacion y ainda no tin prueba concreto cu cual nan por bay over na oficialmente acusa e politico di AVP di cualkier violacion di ley.

Hasta Ministerio Publico a bay asina leu na indica cu te cu luna di september benidero, lo no tin claridad si esaki lo t’e caso mirando su agenda y henter e situacion cu e pandemia, pero awor di repente despues cu Prome Minister a baha su Gobierno algun siman atras, di repente e caso a bay den “versnelling” caminda varios detencion a cay, cual mas cu claro ta duna cierto indicacion cu tin politica tras di esaki.

Dos otro miembro di MEP tambe a reacciona, cuestionando e hecho cu lider di AVP ta critica Ministerio Publico, pero aki por mustra cu ta mesun hendenan aki, esta sr. Tjon, sra. Tromp-Lee y sr. Vrolijk, a sinta man crusa den Parlamento y coopera pa yuda baha Minister Marisol Lopez Tromp, sin un dia pidi Gobierno pa duna claridad riba e denuncianan cu Marisol a haci contra un ex Minister y otro Ministernan cu tabata den e Gabinete aki.

Den forma bon cla Marisol e tempo ey a mustra cu documentonan oficial, kico a pasa y kico ta pasando, entre otro un di e trio aki a puntra e Minister si tin mas Minister di Gabinete Wever Croes envolvi den otorgamento di tereno contra regla, e Minister e tempo ey a confirma cu si.

Prome Minister a solicita pa para e reunion e tempo ey y despues a surgi henter un drama den Parlamento, ora cu entre otro e tres miembronan aki, a sostene un mocion cu no tabatin base legal, cu nunca mester a wordo trata, poniendo cara di Parlamento na berguensa den henter Reino Hulandes.

Ora cu e mocion di desconfiansa  cu no tabatin base legal a wordo aproba cu 9 voto na fabor, nan a forma parti di un comedia drama di Presidente di Parlemento kende a wordo yama pa Gobernador, pa mustra cu e mocion aki no tabatin base legal y cu despues a anula esaki.

Awor ta sali e mesun Edgar Vrolijk aki ta bisa cu lider di AVP ta pro corupcion, pero ta parce cu t’e sufri di perdida di memoria ya cu su persona y fraccion di su partido, a sostene un mocion ilegal pa baha un Minister cu a denuncia corupcion y te awe, nunca ni Vrolijk y e otronan a pidi claridad di nan Gobierno riba e asunto serio aki.

Nan no a sostene Minister Marisol siendo nan Minister cu nan ta sostene, den su esfuerso pa denuncia e abusonan cu a wordo cometi y awor nan ta hopi gevoelig pa otro hende cuestiona e maneho di Ministerio Publico.

Vrolijk durante e reunion caminda Marisol a divulga e corupcionnan, den su disertacion a mustra cu mester investiga e asuntonan aki, a cu ta algo serio pero nunca mas el a duna un solo indicacion cu e kier claridad den e caso serio aki.