Cu operacion yama Single Port VATS pashent ta recupera mas liher

Diariamente diferente tipo di operacion ta tuma lugar na Dr. Horacio E. Oduber Hospital cu e meta principal pa mehora e salud di cada pashent. Y tin biaha cosnan extra special ta sosode den kamber di operacion y e dia aki esey tabata e caso.

Dr. Tim Peterson hunto cu dr. Eric Vinck, tur dos ciruhano na Hospital tabatin e mainta ey un operacion di pulmon y e biaha aki pa prome bes a haci uzo di e tecnica yama “Single – Port Video- assisted Thoracoscopic Surgery”.

Normalmente un operacion asina ta sosode  cu 3 corta chikito y e biaha aki manera e palabra mes ta indica, esta “single”, a haci’e cu un (1) corta chikito so.

Dr. Tim Peterson ta conta cu normalmente ta drenta den e thorax pa medio di mas corta chikito, cual ta mas dolor p’un pashent ora di mester recupera. Awendia tin otro tipo di operacionnan inovativo, unda e meta prinicipal ta purba haci e proceso di recuperacion menos dolor posibel.

Dr. Eric Vinck ta conta cu normalmente ora di opera pulmon ta uza e tradicional corta mas grandi y esey ta haci cu e operacion ta dura mas di un ora largo.

Dor di a haci uzo di un corta mas chikito, esta e “Single Port Vats”, e operacion a dura total solamente 40 minuut,

Un beneficio di esaki ta menos dolor p’e pashent y tambe e por bay cas mucho mas liher, ya cu e tin corta chikito, por cura mas liher y e cicatriz ta menos. Visualmente claro e ta hopi mas agradabel y por sigui mas rapido bek cu su bida.

Den e caso aki e operacion tabata uno p’asina por yega na un diagnostico. Nan a tuma un parti di e pulmon p’e specialista di pulmon haya informacion di e patologo pa nan por yega na un conclusion kico e pashent tin y con ta bay trat’e.   

Dr. Peterson a agrega cu e idea ta pa wanta pashent na Aruba y no mester bay afo leu di famia. Aki poco dia dr. Vinck ta bay cuminsa cu su specialisacion yama “cardiovasculaire chirurgie” na Medellín y pa ora e termina e regresa Aruba. Den e cuadro ey, e ta ricibi guia di tanto dr. Casper Laclé como dr. Peterson.

“E idea ta pa hunto tur departamento di Hospital sigui contribui cu inovacion. Tur ta practica formulanan nobo, uza tecnologia p’asina mehora servicio y calidad di tratamento p’e pashentnan.

Den caso di cirugia, e idea ta pa haci e experencia di e pashent hopi mas agradabel, haci nan estadia na hospital hopi mas cortico pa nan termina nan recuperacion na cas hunto cu nan famia,” dr. Vinck a duna di conoce.