Idea educativo y leuk pa haci cu bo famia na cas

Tur dia mucha ta siña algo nobo. Tambe ora nan ta na cas. Si bo yiu yuda bo traha cuki, e ta siña midi y con pa mescla mansa. Si cura di cas ta yen di mata, e ta mira parha, barbulet y hopi insecto. Tin diferente manera cu bo por percura pa momento di siña por tuma luga cu regularidad. Mirando e situacion actualmente cu e pandemia, aki tin algun idea leuk y educativo cu por wordo haci cu bo famia na cas mes:

  • Resolve problema: haci pregunta interesante.
    Pone un pregunta den cushina riba un borchi chikito of papel grandi. Esaki bo ta haci cada tanto dia. Por ehempel, bo ta scirbi “Cua blachi di cua mata tin e forma aki?” y bo ta pinta e forma di e blachi. Of bo ta puntra “Cuanto cero (0) tin den 1 miyon?”. Bo ta duna esun cu sa e contesta bon algo chikito. Bo por busca pregunta den buki, via noticia, riba internet, etc.
  • Traha un snack di “Rekenen”.
    Mucha ta corda cos mas lihe ora nan purba of mishi cu nan. Corta fruta cu bo yiunan gusta den mita, 3 of 4 pida y si por den 10 pida. Duna nan un pida y laga nan rey si ta un ¼ nan ta comiendo of no. Y sigi vari’e.
  • Creatividad: traha un caha di idea.
    Hopi biaha mucha tin tremendo idea y no sa kico pa haci cu nan. Laga bo yiunan traha un caha cu un spleet manera spaarpot. Den e caha tur hende den cas por tira nan idea aden. Asina bo ta laga bo yiunan sa cuanto bo ta balora nan pensamento creativo. Bo por check e caha tur dia y si bo haya algo reacciona cu entusiasmo. Y si no, anima bo yiunan pa pone nan idea den e caha. Topiconan di idea por ta e.o. riba cuminda pa prepara, cua Actividad por wordo haci durante vakantie, unda pa bay diadomingo, solucion pa un problema of ora tin un malcontento den cas. Por habri e caha un bes pa siman y hunto repasa e ideanan.
  • Hunga diccionario.
    Un miembro di famia (hungado nr. 1) ta lesa for di un diccionario diferente palabra cu ta straño pa e otronan tende. E ta scohe un palabra, ta mencion’e na bos halto y ta scribi su nificacion riba un papel, pero e otronan no mag di wak su papel. E otro miembrona di famia ta pensa riba posibel nificacion di e palabra y ta scirbi esaki riba nan papel. Hungador nr. 1 ta recohe e papelnan y ta lesa duro loke tin scirbi, incluso esun di dje. E otronan mester bisa awor cua ta e nificacion corecto.
  • Naturalesa: traha un cas di fruminga.
    Cu esaki bo famia por wak fruminganan di cerca y mira con duro nan ta traha pa coba un pasada y yega na cuminda. Pone un baki chikito di plastic den un baki mas grandi. Yena e espacio entre e dos bakinan cu tera te na rand. Muha un pida spons y pon’e den e baki mas chikito. Pone eyden tambe poco stropi. For di den e tera bo ta colga algun hilo fini cu ta bai cai den e baki chikito. Asina e fruminganan por yega na e cuminda y e awa. Busca algun fruminga door di pone tiki stropi riba pida papel y pone esaki abou. Ora bo haya un grupo di fruminga bo ta pone e papel cu nan ariba den e baki. Ta tapa e baki cu plastic wrap of waxpaper y traha algun buraco chikito. Want’e cu un elastiek. Awor tapa e bakinan completo cu un papel preto pa e fruminganan keda den scur y want’e tambe cu elastiek. E baki chikito a bira nan cas. Un par di dia despues bo ta kita e papel y boso lo mira loke e fruminganan a haci. Laga e fruminganan liber ora caba cu e observacion.
  • Stimula sentido.
    Bo yiu ta pidi bo atencion mientras bo ta cushina? Puntr’e un rato pa sera su wowonan y bisa con yama e diferente specerij cu e ta hole. Bo por cuminsa cu lag’e hole esnan mas conoci manera siboyo, conoflok. Despues bai pa kaneel, ginger, menta, oregano, etc. Y di mes peper no.
  • Geografia: perspectiva global.
    Lanta interes di bo yiunan pa geografia door tin un mapa di mundo of un globo na un luga central den cas. Nan lo familiarisa cu nomber y lugar unda diferente pais na mundo y cuidadnan ta. Tambe nan lo por mustra bo di unda algo ta bin. P.e. ora di haci compra, laga nan wak di unda e productonan ta bin y mustra e pais. E productonan por ta comestible, paña y coi hunga, etc.
  • Traha frasenan gracioso.
    Hasta mucha cu ta kere cu nan no ta gusta scirbi lo gusta e siguiente wega. Duna tur miembro di famia un sker, papel sin liña, un stick di lijm y papel di corant. Pidi nan pa corta palabra of frasenan cu nan ta mira den letra grandi y traha frasenan pret. Mas straño, mas pret, mas miho. Ora tur caba ta lesa nan pa e otronan tende.

Asina bo mes por varia e diferente ideanan menciona aki segun e custumbernan di cas.

Fuente: Family Fun.
Pa mas informacion riba educacion por acerca Fundacion Pa Nos Muchanan na Cumana 2,
 tel. 5834247/5880856, e-mail:
info@fpnm.aw y website: www.fpnm.aw