Kiko i kon mester drecha e relashon ku Hulanda?

KU BENEFISIO di duda nos a tuma nota di e hecho ku e moshon di senador Paul Rosenmöller pa drecha e lasonan entre Hulanda ku Kòrsou i e otro islanan di Karibe Hulandes, a keda aseptá casi unánimamente den senado Hulandes (Eerste Kamer).

Ta partido PVV di Geert Wilders so tabata kontra. Aki ta trata di un moshon ku ta eksplisitá e hecho ku segun Senado e relashon entre e islanan di Karibe Hulandes i Hulanda mester drecha.

Natural no ta un mocion ku a kai for di shelu, pasobra polítikonan na Hulanda klaramente a keda sakudí ku e resultadonan di e elekshonnan di dia 19 di maart último na Kòrsou.

Durante e mesun debate ei, senador Jeroen Recourt tambe a trese padilanti ku e relashonnan ku Hulanda no ta masha, referiendo na Sint Maarten ku ya a hiba Hulanda Nashonnan Uni, akusá di komportashon kolonial versus di nan isla, Kòrsou ku a vota di forma aplastante kontra di Gobièrnu Rhuggenaath, respektivamente desaprobando e maneho di Hulanda awor cu Covid 19 a destruí e restunan di e ekonomia Kurasoleño.

Senador Paul Rosenmöller den su entrevista ku Tele-Curaçao a menshoná aprobashon di e moshon komo un señal na Gobièrnu Hulandes cu asina e Gobièrnu nobo di Hulanda asumí poder, mester traha duru pa duna mas prioridat na e relashonnan den Reino.

Anto aki el a referí na áreanan manera siguridat, maneho sosial, ekonomia i enseñansa. Rosenmöller a haña ku e kontaktonan mester ta mas estrechá di tal manera ku e komunidat di Kòrsou por saka mas probecho.

Segun Paul Rosemöller e moshon aki sin duda lo haña atenshon den e akuerdo i programa di gobernashon di e Gobièrnu nobo na Hulanda.

Mas aleu den e entrevista ku Tele Curaçao a referí na COHO ku a keda rechasá pa Raad van State i e asina yamá ‘geschillenregeling’, ku tampoko no tin fin di lanta for di suela pa kaba.

Pero aki senador Paul Rosenmöller a kontinuá bisando ku e Gobièrnu nobo no por neglishá su moshon aprobá den Senado. Tambe Rosenmöller a suprayá ku den e debate a diskutí ampliamente ku Sekretario di Estado di Reino Raymond Knops riba e tópiko aki i ku e relashonnan ku e islanan tabata demasiado basá riba deskonfiansa. Remarkabel t’e hecho ku den e mesun rosea Rosenmöller a aksentuá ku tantu Sekretario di Estado Raymond Knops komo Minister Presidènt Eugene Rhuggenaath a hasi tur esfuerso, pero sin resultado.

Riba e tema COHO, esei segun Rosenmöller tabata robes di parti di Hulanda pa a trata di imponé esaki riba e islanan, siendo un aktitut asina sigur no ta kuadra den e esfera di Reino.

E sistema komo sifuera e islanan mester guli manda abou, segun Rosenmöller no t’e manera pa atendé ku otro den Reino, pues mester kambia esaki pa un sistema di traha den estrecho koperashon.

Tambe e desaprobashon di Raad van State di COHO ta un asuntu serio segun Rosenmöller, pero sí e ta aploudí e ‘landenpakket’, ounke esei no mester enserá ku ta kita kompetensianan for di e islanan, pasobra eseinan no ta kuadra ku Statüt.

Pa loke ta trata e ‘geschillenregeling’, segun Paul Rosenmöller riba tèrmino kòrtiko lo kontinuá ku kòmbersashon i deliberashonnan riba esei.

Den e entrevista ku Tele-Curaçao a resaltá ku a sigui puntra senador Paul Rosenmöller ki dia e moshon aki lo keda konkretisá.

Pero aki e senador no tabata asina konkreto sino simplemente a referí ku esei en prinsipio ta un tarea di e Gobièrnu nobo na Hulanda, pero ku e Gobièrnu demishonario na Hulanda ainda por aktua di akuerdo ku e espíritu di e moshon.

I ku entre parlamentarionan, mandatarionan di e paisnan i hasta ku organisashonnan aktivo den komunidat, saliendo for di enseñansa, instansianan di salubridat, sirkunstansia sosial, e trabounan por keda hasí.

Prinsipalmente pa loke ta trata temanan manera pobresa, derechonan humano, situashon den enseñansa. Ku tur rèspèt p’e moshon aprobá kasi unánimamente den Senado Hulandes. Pa kua senador Paul Rosenmöller a ekspresá asina tantu konfiansa i optimismo: “…..E asuntu di drecha relashon entre Hulanda ku nos islanan, ta birando manera un mishon imposibel.  Si no ta na banda di Kòrsou, ta na banda di Hulanda e tipo di kretologianan aki ta keda bentá den laira, pero finalmente nada no ta sosodé….”.