No ta momento pa experimenta cu partido sin experiencia

Eleccion benidero, pa ta exacto 25 di juni, lo ta uno crucial p’e rumbo di nos pais. E importancia di vota e biaha aki ta esencial pa sigura/recupera autonomia di nos isla Aruba. P’esey e pregunta, dicon vota, pero mas cu claro dicon vota pa Robert Candelaria?

Principalmente e contesta ta lo siguiente: “Pasobra lo trece trankilidad den husticia, lo trece añas di experiencia den sector priva y policial hunto, cual t’e combinacion ideal pa traha den un sistema preventivo enbes di uno retroactivo, treciendo bek stabilidad, confiansa, paz, structura, organisacion y respet den tur Departamento di Husticia como prioridad.”

No tin espacio pa atake politico personal. Tin cu enfoca riba campaña y gobernacion di calidad cu contenido. Lo trece stabilidad, liderazgo y cooperacion den tur e departamentonan di nos aparato hudicial. Tambe lo yuda Aruba bira consiente cu prevencion ta clave pa combati criminalidad. Entre otro fortifica e institucion ‘Famia’ caminda e concepto di ‘control social’ ta parti esencial di esaki.

Robert Candelaria ta duna di conoce tambe cu e ta mira e importancia den tecnologia pa crea cooperacion estrecho entre stakeholders pa combati criminalidad. Integracion y adaptacion di e gruponan minoria den nos sociedad ta puntonan cu mester di antencion. Ta kere den cambionan di ley na beneficio di tur y na fabor di husticia di nos pais.

N’e momento aki no tin espacio pa experimenta cu partidonan nobo sin experencia den gobernacion, sin un bon relacion cu Hulanda y sin contactonan directo pa logra dialogo importante pa nos recuperacion. Bo voto na partido AVP y e confiansa den su candidatonan ta e base  clave, pa hunto nos logra recupera di e crisis actual.