Polis mester para den rij pa usa un computer

Ayera mainta Recherchenan na Warda di Polis na Shaba a bisa di ta basta y a dicidi cu ayera nan ta pone nan trabao abao. Nan tin como 4 aña ta warda pa computer, muebles, etc. pero parce cu nan ta tirando grito den desierto. Ni computer, ni muebles. Nan a bay tur caminda, pero ningun hende ta duna nan oido. P’e motibo aki mes, nan pasenshi a caba y a dicidi cu ‘enough is enough’.

E miembronan aki tin sosten di nan sindicato SPA, unda e Presidente di Sindicato di Polis, SPA, Joselito Dirksz, den un tono basta rabia, a expresa su disgusto con henter e Departamento di Recherche p’e districto di Noord ta pasando aden. Nan tin sumamente hopi trabao pa un departamento cu practicamente e personal ta trahando riba otro.
A trece e situacion aki na atencion di Minister di Husticia mr. Andin Bikker, p’asina e por haci algo. E mandatario lo a duna opdracht pa por yega na un solucion di e keho di e Recherchenan, pero te asina leu, no a haci nada.
Segun Presidente di SPA, Joselito Dirksz, no ta husto cu Recherche mester warda nan beurt den rij pa por haci trabao.

Y situacion ta un caos, unda tin biaha masta no tin coriente tin ocasion tambe por menciona cu e luga no tin coriente. Den warda mes, e situacion no ta apto pa traha. Cuanto di e agentenan aki, nan bista a bay atras, ya cu practicamente no por mira mas riba nan computer. A papia cu hopi hende pa mira ki solucion por yega na dje, pero dado e circunstancianan, e personal di Recherche a bisa ta basta. Criminalidad ta sigui subi y tur esaki ta refleha den e trabao di Recherche. Joselito Dirksz ta sigui menciona a manda varios e-mail, caminda cu tur hende ta bay di acuerdo. Tin notules haci di e diferente reunionnan cu e Minister, pero no ta haci nada. Awor cu a dicidi bay prensa, tur hende ta core cabe’i gay. Dirksz ta menciona tambe cu e situacion cu nan ta trahando aden definitivamente ta inhumano, y esaki tambe ta opinion di DVG. Mas cu mitar di e personal na Shaba a haya Covid, y asina mes, nada no a pasa.