Procedura di visa a bolbe na normalidad dia 15 di april 2021

For di dia 15 di april 2021 Reino Hulandes ta elimina e parti di pre-screening cu tabata wordo haci dor di e paisnan den Caribe Hulandes pa loke ta trata e procedura di peticion di visa.

Den e periodo prome cu Covid, biaheronan tabata aplica pa un visa na Embahada Hulandes na nan pais di origen. Durante di e crisis mundial di Covid e emision di visa a stop.

Na september 2020 a inicia e pre-start fase 1 di emision di visa, durante di e fase aki, Ministerio di Asuntonan Exterior na Hulanda tabata trata peticionnan di visa pa biahenan vital of esencial cu ta cay den e siguiente categorianan:

  1. Personanan cu a ricibi un VTA (admision temporal pa Aruba) pa motibo cu lo bin establece nan mes na Aruba.
  2.  Biaheronan M.I.C.E pa motibo di reunion (Meeting), incentivo (Incentives), conferencia (Conferences) of exposicion (Exhibitions).

3. Biahenan di negoshi, interes of vinculo comercial of como parti di un mision economico.

4. Doño di un propiedad na Aruba (residencia, condominio, time-share).

Pues bishitanan pa entre otro turismo (familiar), procedente for di paisnan cu rekeri visa, lo por solicita pa un visa direct via di e Embahada di nan pais di origen, desde 15 di april 2021, manera cu tabata di custumber prome cu Covid.

E medidanan di Covid y e condicionnan di admision n’e diferente partinan Caribeño di Reino ta diferente y ta cambiando rapidamente.

Pa informacion di e condicionnan cu ta aplicabel pa Aruba por recuri na e siguiente pagina: https://www.aruba.com/us/traveler-health-requirements. Cada biahero tin e responsabilidad pa nan por ta bon informa di e situacion actual. Via di e pagina Nederland Wereldwijd www.nederlandwereldwijd.nl, www.paisesbajos.nl y n’e website di cada Embahada e biahero lo por lesa mas over di e condicionnan cu ta aplicabel na momento di haci un peticion pa un visa.