California Lighthouse ta habri bek pa publico

Despues cu na februari California Lighthouse a sera su portanan pa publico pa por haya e debido mantencion awor tur cos ta cla p’e faro su portanann habri bek pa publico entrante e fin di siman aki.
E trabou di mantencion a keda ehecuta pa Projexon Group y a tuma lugar principalmente n’e parti paden, entre otro a repara e trapi di palo, pleister y verf e murayanan parti paden y drecha e bentananan. E cambio mas grandi t’e instalacion di un ‘trapleuning’ pa por tene na dje na momento di subi e lighthouse. P’esaki Stichting Monumentenfonds Aruba (SMFA) mester a pidi permiso na Monumentenbureau mirando cu ta agregando algo nobo n’e monumento.
E trapleuning no solamente lo haci e subimento mas sigur, pero tambe lo yuda cu e parti di mantencion di e faro mirando cu asina awor ta evita cu ta keda pone man n’e murayanan pa por tene y subi.

Pa locual ta trata e pleister y verfmento di e faro parti paden a haci uzo di e material original cual ta kalki. P’esaki Stichting Monumentenfonds Aruba a trece un experto di e compania Limeworks for di Merca pa por duna instruccion n’e contratista con pa prepara e superficie y aplica e producto n’e manera corecto. SMFA a documenta esaki tambe pa por tine pa otro proyectonan.

Cu esaki awor nos tin tres persona mas, cu e conocimento pa locual ta trata aplicacion di kalki riba edificionan historico. Na 2019 diesshete persona a ricibi nan certificado partcipando n’e curso organisa pa Stichting Monumentenfonds Aruba.

Ora ta trata di edificionan historico ta importante pa restaura esakinan cu e material original p’asina evita deterioro n’e edificio. Cu e California Lighthouse ta bira e di tres monumento cu SMFA ta haci uzo di kalki manera tabata uza antes. E forno di Kalki tambe a keda restaura cu uzo di kalki. E uzo di kalki lo por garantisa cu e monumentonan aki lo keda mihor mantene pa mas tempo y lo por asina yuda reduci tambe locual ta gastonan di mantencion p’e Fundacion.

Stichting Monumentenfonds Aruba ta gradici Experitours p’e comprension durante e periodo cu e faro a keda sera pa publico. Pa mas informacion tocante e orarionan cu e faro lo ta habri por sigui e pagina di Facebook di California Lighthouse Aruba.