Lisette Malmberg, otro lider femenino di PPA y #1 riba lista

P.P.A a relansa e partido como “Transforma PPA” y ta presenta sra. Lisette Malmberg como lider y #1 riba lista pa eleccion 2021.  Sra. Lisette Malmberg tin un trayectoria di liderazgo pa mas di 40 aña cuminsando como empresaria hunto cu su famia y despues a dedica su bida na sirbi e comunidad di Aruba. E tabata entre otro lider spiritual, activitista y aworaki e ta lider di P.P.A.

Na aña 1949, sr. Juancho E. Irausquin hunto cu un grupo di lider a lanta Partido Patriotico di Aruba, hacienda esaki e di dos partido mas bieu di Aruba. Sr. Benedict ‘Benny’ Nisbet  (q.e.p.d) a lidera P.P.A for di 1968 te na su fayecimento na december 2020.

Pa eleccion 2021, P.P.A. ta renoba su imagen como “TRANSFORMA PPA”. E partido lo keda P.P.A y e movemento ta TransformA. Pues, e partido tin un bachi nobo, pero lo keda usa e color oranje pa eleccion benidero.

TransformA PPA su vision ta pa ta un nacion den cual tur ta florece y tin 7 pilar como enfoke:  Gobierno y Liderazgo, Famia y Comunidad, Recursonan Nacional, Desaroyo Economico, Finansa y por ultimo, Husticia y Paz. E meta ta pa TransformA e nacion colectivamente pa medio di reforma progresivo den un maneho inclusivo, responsabel y husto, pa bienestar general.

Sra. Malmberg ta menciona cu Aruba ta enfrentando diferente crisis n’e momento aki , sinembargo e crisis real ta uno di liderazgo. Esaki no ta rekeri un solucion politico so, e ta rekeri un colaboracion di personanan dispuesto pa pone nan sabiduria, experiencia, y nan trayectoria di liderasgo, p’asina uni e pueblo pa un cambio di rumbo.  Nos a yega n’e conclusion cu bo no por cambia un sistema para pafo so. 

E mensahe di TransformA PPA ta “Cuidadano, Ban Parlamento. Cuidadano, Ban TransformA.” Cu esaki e partido ta yama personanan den comunidad cu un trayectoria di liderazgo, experticio y curashi  pa forma parti di e transformacion nacional.

Pa mas informacion, por bishita www.transformaaruba.com, whatsapp +297 569 6884 y/of Facebook Transforma Aruba.