Pa falta di pago di alimentashon: Homber na Boneiru a bay 4 luna será!!

WILLEMSTAD – E siguiente informe ta sirbi pa konsientisá hòmbernan ku no ta kria nan yu apesar ku tin òrdu di Korte pa nan paga plaka di alimentashon.

Masha poko biaha kasonan asina ta bin den publisidat pasobra mayoría biaha ora ku tata dje yu of yunan faya, nan ta kore hasi areglo pa no bai será.

E tipo di detenshon asina yama “gijzeling” kaminda e gobiernu ta warda e homber den prizon te dia e “come across” ku “Green bills”.

Den e kaso aki e asuntu a yega te den Korte di Hustisia Komun na Wilhelminaplein apesar ku e tragedia a tuma lugá den su totalidat na Kralendijk.

Abogado mr. A.T.C. Nicolaas a representá e homber, mientras ku mr. N. van Luijk a atendé interes di mama dje yu muhé ku ya tin 20 aña.

E señora fadá dje inkumplimentu dje homber a pidi pa ‘gijzel’ e homber te ora e disidi di kumpli ku pago di alimentashon i Korte a konsedé su petishon pa ‘gijzel’ e homber durante 4 luna.

I efektivamente nan a ‘warda’ e homber pa pone preshon riba dje pe paga e suma di 22,500 dòlar ku e tabata debe dje alimentashon ku tabata 250 dòler pa luna.

E ‘gijzeling’ a tuma lugar pa mustra e homber ku ta den serio e señora ta bai pa kobra e plaka.

Dia ku e señora a buska abogado pa kobra e homber tata dje yu, e homber a pidi Hues pa no bai di akuerdo ku gijzeling. E señora a insisti pa Hues kita libertat dje homber te dia e kumpli.

E homber a purba ainda pa Korte skòrs su detenshon pero Korte a lag’e keda sinta.

E homber kier a keda bringa e kaso maske e no tabatin sèn pa paga e kaso pero a mustra Korte ku e ta ‘pauper’ i pa no kobr’é.

Pa Hues e kaso tabata relativamente fasil: e pareha ta mayornan dje muhé di 20 aña i na ougustus di 2012 Korte a kondená  e homber pa paga 250 dòler pa luna di alimentashon pe yu.

E homber no tabata kumpli ku e pago atrasá a yega te US$ 22.500,=.

Na yanuari di aña pasá pasenshi dje señora a kaba i el a pidi pèrmitié pa laga aplika e medida di preshon pa fòrsa e homber pa paga. E tabatin e veredikto 8 aña kaba den su poder.

Aña pasá korte na Boneiru a outorisá pa pone e homber tras di trali pa 4 luna te dia e kaba di paga e suma atrasá plus interes.

Dia 25 november 2020 ‘dog catcher’ a hiba e homber e sèl kaminda e mester a biba 4 luna ku mientras tantu a pasa.

Kualke hende lo puntra ki inter e homber tin pa sigi ku apelashon dje kaso pero no mester lubidá ku e ta kondená tambe pa paga gastunan dje proseso i di su estadia bou di tutela di gobiernu.

No ta kosta e homber nada pa purba elimina e kondishon ku e mester paga pasobra tòg e ta prosesá gratis.

Sinembargo sea su abogado a faya un ratu of e homber mes a faya pero dia ku e mester tabata presente pe kaso,, ela bati apsènt pisá. Esei a pone ku ela pèrdè su derecho di apelashon.

Komo ‘mosterd na de maaltijd’ kore a permiti e homber pa prosedé gratis pero e apelashon si kada un dje pareha mester paga nan parti.

No a bin dilanti den e seshon si e homber a paga algu dje debe di alimentashon.