Para-Atleta Elliott Loonstra representando Aruba na competencianan di atletismo na Europa

E para-atleta Arubano Elliott Loonstra hunto cu su coach Luciano Mazzeo a biaha diadomingo ultimo pa Europa pa representa Aruba den competencianan di para-atletismo na Italia y Francia.

Elliott ta Aruba su prome para-atleta p’e deporte di Para-Taekwondo pa cual el a gana varios medaya den diferente competencia internacional.

Na juni 2019 durante e Para Pan-American Championship na Oregon, Estados Unidos el a gana e medaya di brons y na augustus 2019 e tabata e unico para-atleta cu a representa Aruba n’e weganan Para PanAmericano na Peru. Na december 2019 el a biaha pa Brazil caminda cu el a keda tres luna pa train y practica e deporte Para-Taekwondo.

Na februari 2020 Elliott a biaha pa Puerto Vallarta, Mexico y a competi n’e Mexico Open Para Taekwondo Championship y a logra medaya di brons. Na maart 2020 el a bay e competencia pa calificacion na Heredia, Costa Rica pa mira si e por logra un puesto pa representa Aruba n’e weganan Paralympico na Tokio, Japon. Aki el a sa di gana e medaya di plata.

Lamentablemente e presencia di e virus Covid-19 a causa un stop na tur deporte aki na Aruba, pero Elliott a sigi cu su training na cas via varios workshop cu a wordo duna online. Cu apoyo di su famia a pone varios ekiponan na cas pa yuda cu su desaroyo.

Ademas di Para-Taekwondo Elliott a cuminsa train dos otro deporte mas.

Comite Paralympico Aruba a mira su dedicacion y a puntr’e si e ta desea di train atletismo, specificamente javalina y kogel. Elliott a acepta y por mira cu su dedicacion pa cu tur tres deporte ta enorme y ta di admira cu e ta train dos deporte adicional banda di para-taekwondo.

Actualmente e ta na Venezia, Italia pa competencianan di atletismo, specificamente javalina y kogel. Despues di Italia e lo bay competi na Francia y di eynan sigi training y workshop di atletismo na Hulanda prome cu su regreso bek na Aruba.

Nos kier desea para-atleta Elliott Loonstra tur clase di exito!