Djesun aña pasá a kuminsa ofisialmente ku Hospital Nobo ku 300 kama

WILLEMSTAD – Falta algu mas ku 3 luna pa ‘selebrá’ e di dos lustro dje inisiativa pa lanta un hospital nobo na Kòrsou pa remplasá Sint Elisabeth Hospitaal.

Naturalmente no ta riba e fecha ei a kuminsa konstrui ni pone promé piedra pa kuminsa konstrui e hospital, pero a kuminsa duna e kontrat na kompanianan pa kuminsa konstrui e hotel.

Gobiernu a kontratá e instituto SONA pa supervisa realisashon dje hospital i na kaminda tabata kantidat di ‘trammelant’ ku a demostrá ku e tabata un sapatu demasiado grandi pa nos teknikonan lokal só abarká.

SONA a keda enkargá pa guia e kontratistanan pa Kòrsou haña su hospital nobo, operashonal i duradero.

Despues di 8 aña ta traha riba e hospital, Parlamento a pidi Kontraloria General di Kòrsou pa investigá e proyekto akí enbista di e gran impakto sosial i finansiero ku e proyekto tin riba komunidat.

Kontraloria  a kuminsá traha inmediatamente riba e petishon di Parlamento te ku na 2011, tur hende tabata papia di Nos Hospital Nobo.

Un gòlpi grandi i kostoso p’e proyekto tabata ku a kambia e sitio di Nieuwe Haven pa Otrobanda na sèptèmber di 2013 i tei nan a kuminsá referí n’e hospital komo Hospital Nobo Otrobanda of tambe komo Curaçao Medical Center/HNO.

PREGUNTA KLAVE

E pregunta ku parti di e investigashon ta kontestá ta lo siguiente: E hospital nobo ta kumpli ku e nesesidatnan di kuido di pais i e ta kuadra den e struktura di kuido hospitalario di pais?

Komo punto di salida pa determiná loke e hospital nobo lo mester a ofresé, a usa e nesesidat di kuido hospitalario di pais sperá na 2015 i loke e otro instansianan ku ta ofresé kuido hospitalario, esta, (e tempu ei) Kliniek Dr. J. Taams B.V. i Antillean Adventist Hospital tabata ofresé.

A disidí ku e hospital nobo lo mester ofresé e mesun kuido hospitalario ku Sint Elisabeth Hospitaal tabata ofresé e tempu ei, ku un kapasidat adaptá di 300 kama i algun ampliashon adishonal ku Konseho di Minister a fiha.