Dos persona levemente herida den accidente na Primavera, un a wordo deteni

Diasabra anochi algo prome cu 9:30 p.m Polis a wordo informa di un accidente den area di Plantenrust y cu hende herida. Den prome instante nan no por a localisa e dalmento.

Despues di un rato a bin topa cu e accidente na un crusada mas panort di Plantenrust. Ariba un crusada den Primavera a bin topa cu un Nissan Sentra y un Nissan Cube.

Den e Sentra, e chauffeur lo tabata sinti malo y ambulance tabata na caminda. E accidente a sosode momento cu e Nissan Cube lo a subi caminda net momento cu e Sentra tabata yegando. Un impacto bastante fuerte, mirando con ambos auto a keda.

Na yegada di ambulance e paramediconan a controla chauffeur di e Sentra y no a haya necesario p’e bay Hospital. 

Momento cu el a bay bek n’e Sentra, el a wordo deteni debi cu e tabata maneha auto bou influencia.

Aunke e no tabata esun cu a causa e accidente. 

Den un poco yerba pazuid di caminda Polis a haya un hemchi cu boter di cerbes y un boter di Old Parr, esaki nan a wordo saca for di e Sentra prome cu Polis a yega.

Un di dos ambulance a yega pa controla e dama na stuur di e Nissan Cube. Ambos chauffeur tabata ok, pero tabata desea pa wordo controla dor di Paramediconan. 

Chauffeur di e Sentra a wordo poni den boei y mester a warda pa transportwagen di Polis cu a hibe Warda di Santa Cruz, unda e lo mester a presenta dilanti un Sub Fiscal. Dos pasahero den e Sentra mester a yama un persona busca y hibanan nan cas.