Fase ta un farce

Parlamentario, drs. Mervin Wyatt-Ras, ta lamenta cu FASE ta un farce. FASE a ser lanta despues cu Aruba a ser confronta cu e virus di Covid-19.

Segun Minister encarga cu Asunto Social, Glenbert Croes, e ta un ayudo Social di Emergencia p’esnan cu a perde trabou. Sinembargo esaki no t’e caso manera cu e Minister aki ta gaba of ta insinua.

Tin persona cu ta ricibi Loonsubsidie y otronan ta cay bao di FASE. Pero e Parlamentario ta wordo aserca dor di diferente cuidadano cu no ta haya FASE, ni Loonsubsidie ni ta haya un pakete di cuminda via Rode Kruis ni via di Fundacion pa nos Comunidad. Nan tin cu biba di loke famia por yuda. Esaki ta un situacion sumamente alarmante y dificil pa diferente famia cu ya prome cu tempo di Covid a perde trabou y ta tende di trahadornan Minister cu nan no por bin na remarca pa FASE. Tin persona cu ta registra y no ta tende mas kico a pasa cu nan peticion y ta ser notifica cu mester yama e Minister.

Mientrastanto Minister Glenbert Croes ta bisa cu tur hende por haya FASE. Esey segun Wyatt-Ras no ta cuadra cu realidad, esey ta un mentira, esey ta un engaño. Tanto sector publico (12.5%) y Parlamento (25%) a entrega parti di nan salario pa yuda nos pueblo. Aki ta placa di pueblo ta yuda pa nos hendenan por haya yudansa. Gobiero a traha un presupuesto di 1 biyon pa busca yudansa for di Hulanda. Despues di a keha cu tin megadebe nan mes a core fia schat di placa for di Hulanda a cambio di condicionnan descabeya, cu medidanan, entregando di e forma aki nos autonomia. 

Mientrastanto tur esnan afilia na Gobierno y famianan di gobernantenan a keda cu nan bunita salario, beneficionan y toelagen. Gobierno no a corta den su gastonan di luho.

Enbes cu Gobierno a bay na tur hende, incluyendo nan “friends and family” pa entrega algo pa yuda nos pueblonan no a haci esaki.

Awor hasta Minister Glenbert Croes ta gaba cu e ta bay sigui cu fase y lo yama TIO (Tijdelijke Inkomsten Ondersteuning), cual ta ensera mas placa.

E suma lo ta mara n’e ultimo entrada di e cuidadano di minimo 1250 y maximo 2950. Esaki ta un promesa djies pasobra ta campaña.

Pasobra mientras tin hende cu no tin cuminda na un banda e Minister ta gaba cu e lo hisa e suma di FASE. Wyatt-Ras a yega si sugeri e Minister pa registra, kendenan no ta bin na remarca pa FASE pa por duna nan ayudo, pero ni musca no a bula.

Minister Glenbert Croes no ta serio pasobra e no ta informa nos hendenan debidamente.

Parlamento den reunion cu Gobierno tocante landspaketten, despues e baca a hoga caba, por a tuma nota cu e Minister aki y su Gobierno ya caba a compromete Aruba cu Hulanda cu lo bin un dado momento flexibilisacion di nos mercado laboral y cu lo tin tambe un werkeloosheidsuitkering.

Es decir anticipando riba retironan Gobierno kier suavisa esakinan dor di duna e sumanan y bin cu TIO pa sera boca di pueblo. Esey ta encera tambe cu lo kita of lo bay permiti cu lo kita nos hendena for di trabou.

Wyatt-Ras ta di opinion cu Gobierno no mester gaña nos hendenan. Gobierno mester ta transparente y sincero. Gobierno mester papia cu berdad. Gobierno no mester presenta algo bunita pa despues nos hendenan haya un bofta den cara.

Pues henter e asunto di FASE aki, Wyatt-Ras ta haya ta un farce y ademas henter e forma con ta anda cu e area social. E Minister aki a bisa cu tin crisis social y a haya for di Parlamento e aprobacion pa un suma pa combati e crisis aki. Sinembargo e no a haci loke el a priminti.

Te ainda tin instancianan cu no a haya e yudansa cu nan a ser priminti dor di Minister. Pa loke ta trata yudansa pa victimanan di abuso di mucha tampoco no a haya ningun solucion. Tin plan cu a ser traha dor di profesionalnan, pero no a ser ehecuta dor di e gobernacion aki.

Mervin Wyatt-Ras tabata critico riba e fondo di crisis social y a haci cantidad di pregunta al respecto tanto den reunionnan publico como por escrito, sinembargo Gobierno tog no a considera p’asina tene cuenta cu sugerencianan.

Wyatt-Ras ta haya cu den pandemia por a usa formanan nobo pa comunica cu e cliente den problema, p.e. via di un app of website, banda di telefon y whatsapp cu ta ser usa caba.

Sinembargo ora topa clientenan cu problemanan psychosocial nan ta canando rond sin haya oido pasobra Gobierno no kier facilita formanan mas moderno di comunicacion cu cliente. En efecto Gobierno a pone alrededor di 50 trahado extra, pero sin e medionan dor di cual e cliente no ta ser yuda manera mester ta.

Gobierno a haya casi 4 aña pa alivia loke nan a yama crisis y si berdaderamente tabatin crisis mester a duna e solucion di inmediato. Hasta gruponan di accion a demostra y nada no a ser cumpli cu nan.