Homber cu a caba di traha y no tabatin permiso pa ta riba caya a keda deteni

Diasabra algo prome cu 10’or y mey di anochi, Polis a topa un auto, Kia Rio riba caminda di Piedra Plat na altura di Pizza Hut. Den e auto tabatin dos homber kendenan a caba di traha. Polis mesora a para e auto pa haci un control.

Durante e control, e chauffeur a mustra e Polisnan cu e tin carta cu el a caba di traha y tabata riba caminda pa bay cas.

E ocupante cu tambe a caba di traha, pero no tabatin un carta den su poder. E homber a splica Polis cu el a caba di traha, pero no por a haya lift mas prome pa bay su cas y mester a keda warda riba e chauffeur, kende ta su amigo caba di traha p’asina e por a haya un lift pa su cas.

Polis no a tuma e splicacion di homber aki den consideracion, maske cu ambos homber tabata den uniform di trabou y bayendo direccion di nan cas, tog Polis a opta pa detene e homber, pa motibo cu e no tabatin un carta den su poder.

E homber a wordo transporta cu transportwagen di Polis pa Warda di Santa Cruz, caminda e lo mester presenta dilanti Sub Fiscal y despues cu e haya su boet e lo por bay cas.