Minister Xiomara Maduro a sera conoci cu Director nobo di gremio comercial ATIA

Diabierna Minister Xiomara Maduro a reuni cu gremio comercial ATIA pa sera conoci cu sr. Herrick Henriquez, kende t’e Director nobo pa ATIA. Presente tambe tabata e Presidente di ATIA sr. Frank Snijders y sra. Tisa LaSorte, kende ta miembro di e board di ATIA.

Durante e reunion a toca diferente tema, entre nan, e importancia pa comercio propaganda y incentiva vacuna p’asina nos por recupera nos economia mas liher. E ta importante pa mas hopi hende haya vacuna y akinan ta na unda cu mester por conta cu e cooperacion di e doño di trabou tambe pa yuda apoya y incentiva nan trahadornan pa bay vacuna. E apoyo di comercio lo yuda pa Aruba su economia recupera mas liher.

Un otro punto tabata e reforma fiscal y aki e mandatario a splica cu awor den cuadro di e ehecucion di e Landspakket, Gobierno ta haciendo calculacionnan nobo p’asina despues di eleccion por tuma e decisionnan necesario.

Minister Xiomara Maduro a brinda informacion tambe riba e sosten financiero cu Gobierno ta keda brinda den aña 2021 den forma di Sosten Financiero pa kwartaal y Subisidio di Salario na comercio pa por surpasa e crisis.

E mandatario a splica cu den Presupuesto 2021 e sosten financiero ta presupuesta y ta wardando pa Parlamento yama e reunion publico p’asina por aproba pa Gobierno keda brinda yudansa na comercio.