No para na banda, Actua!

Cu e yamada “NO PARA NA BANDA. ACTUA!” na hobennan di Aruba, e popular docente di ley universitario Ryçond do Nascimento, a anuncia oficialmente cu e ta pone su mes eligibel pa eleccion dia 25 di juni awor.

Esaki lo ta un di e sorpresanan mas positivo di e campaña pa eleccion aki: Un hoben, docente di universidad, cu un bida ehemplar, cu un capacidad intelectual grandi, cu un caracter amical y habri y un motivacion excepcional, ta scoge pa drenta politica na momento cu mas nos pais mester di hende capacita asina. Tremendo!!!

Ryçond a tuma e expresion di “no para na banda” for di e otro exterto constitucional Arubano di partido AVP, dr. Mito Croes, kende na 1985, mey mey di e crisis despues di ciere di LAGO y na vispera di comienso di Aruba den Status Aparte, a drenta política, pasobra e tambe tabata convenci cu e hendenan cu por yuda saca nos pais di e crisis no mester keda para na banda ta critica y lansa ideanan den confort di nan cas y trabou.

Mescos cu na 1985, mr. dr. Ryçond do Nascimento a haci un yamada na hobennan pa no para na banda mas.

Ryçond a bisa: “Mi sa cu tin hopi otro hoben profesional cu kier wak Aruba bira un mihor cas pa nos tur. Mi ta invita bo pa usa bo conocemento y bo capacidad pa yuda construi e pais cu nos ta anhela.

Cambia e inkietud cu ta pone Boso preocupa y imagina con otro tur cos por ta, den accion pa haci e soñonan ey bira realidad. Sea den politica of den cualkier otro forma den comunidad, ban usa nos conocemento y capacidad na sirbishi di nos pais. Ban haci’e awor! Mi sa cu nos por! Mi ta conciente cu nos mester! Alfin, Aruba ta nos cas!

AVP…dimes!

Pa Ryçond do Nascimento e escogencia pa subi e lista di partido AVP tabata uno logico. Su argumentonan ta simpel y solido: For di punto di bista historico AVP t’e partido cu a pone e fundeshi p’e pais autonomo den Reino y moderno cu nos ta awe. No solamente riba tereno estatal, pero mas ainda p’e tipo di gobernacion democratico participativo cu AVP a practica den cada gobernacion. Y no den ultimo lugar, p’e renobacion di idea y plannan pa nos pais cu AVP a demostra p’e ultimo 35 plus aña.

P’e docente di ley constitucional practica y desaroyo di democracia ta esencial. Gobernacion habri, transparente, sin previlegio pa algun y sin persecucion politico ta crusual. E escogencia pa AVP, pesey tabata logico. AVP DIMES!

Pesey tambe den su discurso, Ryçond a pinta un contraste cla entre e tipo di gobernacion autoritario y inefectivo di e Gobierno actual (MEP POR y RED) y e gobernacion participativo di AVP. Pa un pais democratico cu kier envolve tur hende, cu ta reconoce e contribucion di tur hende y tur grupo, dialogo ta indispensabel segun Ryçond Santos do Nascimento.

E elementonan di un democracia bibo, participativo hunto cu liderazgo actual di AVP cu ta busca inovacion constante y cu semper a genera e idea y plannan nobo, cu a pone nos pais riba pia bek despues di cada crisis, t’e motibonan pakico Rycond a scoge logicamente pa partido AVP.