Pachi a yuda ruman y primo drenta Aruba cu droga y awe ta den KIA

E 4 hombernan cu a hunga un rol den e cargamento di droga y hende cu a drenta Aruba ilegal dia 25 di october tabata: Gregorio Eduardo Fernandez Rojas, Jefferson Rafael Mejia, Deffit Manuel Diaz Nuñez y Fary Jose Aguirre Cohen. E acusacion contra nan ta cu riba e fecha en cuestion, nan a importa droga (cocaina  y marihuana, y a trafica un grupo di persona).

E dia ey a haya 9 persona cu a trata di drenta Aruba ilegal y den auto di esun sospecha (Fary Cohen alias Pachi) di a organisa e biahe, nada menos cu 10 kilo di droga. Fiscal a haci e demanda, pidiendo pa declara tur culpabel y dia 30 di april awor nan lo haya sa si Huez a bay di acuerdo.

Autoridadnan a haya informacion di e transporte ilegal (tanto hende como droga) durante investigacion di un otro caso. Asina a bin sigui e combersacionnan telefonico entre Fary (Pachi) y Gregorio. E ultimo aki tambe ta un persona cu a yega Aruba di forma ilegal na 2019. Esey t’e motibo, segun el a declara, cu el a dicidi di yuda Pachi busca e ilegalnan. Pero di droga e no tabata sa nada. 

Pachi a bisa cu na momento di busca e hendenan, bou cual tabatin un ruman y un primo di dje, el a bay cu e homber Deffit pa yud’e. Nan dos a wordo deteni den un auto y Gregorio den un otro auto cu algun ilegal. A haya e droga den auto di Pachi, cual tabata 7 kilo di cocaina mas 3 kilo di marihuana.

Entre esnan cu a drenta ilegal a detene Jefferson, kende den su prome declaracion a bisa cu na Venezuela el a haya e droga cu e instruccion pa entrega esaki na Pachi. El a declara tambe cu tabata Pachi a organisa e biahe. Pa por participa den e biahe pa Aruba, e mester a bay cu e droga, cu tabatin den auto di Pachi den cual e tambe tabata.

Tabatin un otro persona mas cu a bay cu e otro dos saco cu droga.  Despues el a cambia su declaracion pa bisa cu e no conoce ni Pachi ni Gregorio. Na Venezuela a dun’e e droga pa hiba Aruba y un nomber di un persona cu lo yam’e pa busca e mercancia.

Fiscal a mustra con for di momento cu a haya info cu lo tin un grupo ta yega ilegal, a sigui rastro di Pachi y Gregorio. Asina a mira con nan a bay conoce e ruta den Seroe Colorado un dia prome, a scucha loke nan a papia di e hendenan cu lo bay yega, pero tambe tabatin mencion di droga. Ta conoci den e mundo aki cu momento cu ilegalnan yega Aruba, mayoria biaha ta trece droga tambe. Asina mes el a pidi pa declara Gregorio liber di e acusacion di importa droga.

Pa Pachi, considera e cabes, a pidi 42 luna, a Deffit, kende tabata den e auto cu ilegal y droga, a pidi 36 luna; pa Gregorio 12 luna y Jefferson, kende t’esun cu a transporta e 10 kilo for di Venezuela pa Aruba, el a pidi 18 luna.