Preludio di era di shishi ku bomboshi?

Awe dialuna ta kumpli un luna ku tabatin elekshon general na Kòrsou pa un Parlamento nobo i ekspresamente nos a sinta opservá sin duda nos promé komentario riba e preparashonnan pa yega na un gobiernu di koalishon.

A primera bista ta parse ku e dos komponentenan mas lógiko pa forma fundeshi dje koalishon ta partido MFK i Partido Nashonal.

Si eventualmente lo reforsá e koalishon ku un partido mas ta imposibel pronostiká, pasobra pa loke nos a opservá te awor’aki ta hopi deklarashon di prinsipalmente partido MFK kaminda aparentemente ta varios prinsipe heredero a reservá nan pida monopolio pa vosiferá nan komentario i opinion riba varios tema di aktualidat.

Si un hende no sa mihó, ya kaba e eventual koalishon nobo ta na mando pasobra e koalishon enkabesa pa PAR ta manera ta disparsiendo den skuridat i ta laga kampo liber pa e koalishon entrante duna nan opinion riba tur kos i un tiki mas.

Dje lider politiko i futuro Promé Minister Pik Pisas no a tende masha kos, pasobra  for di dia ku a anunsiá ku e koalishon ta praktikamente klá pa ranka sali, e lider ta A.O.

E sirkunstansia bou di kual el a aksidentá naturalmente mesora a bira tema di spekulashon ku no sa falta den e folklore politiko di Kòrsou.

Ainda e ta miembro di Parlamento saliente, pero no por asisti n’e deliberashonnan debí – por sierto nada produktivo – na su kondishon di salú.

No ku esei ta stroba otro ‘wannabe’ semi-lider pa ta ‘invaller’ den e posishon aki pa regularmente ventilá nan opinion a diestra y siniestra i kritika kontra ken ku nan ta konsiderá un potensial enemigu.

Ta situashonnan asina ta krea e ambiente pa por tabatin un seshon di interkambio i tiramentu di lodo entre  e Minister di Hustisia saliente i e Parlamentario entrante di MFK riba frankamente temanan ta mes bieu ku Metusalem.

Un interkambio ku a tira un mancha riba e funshon di Minister komo riba su kontrinkante politiko kende a hasi un esfuerso deskomunal pa krea fama komo ‘sukkel’.

Na lugá di probechá dje tempu ku tin promé ku gobiernu nobo sinta, el a presta su mes pa partisipá na un tertulia infantil di toma y dáme.

Pa kolmo un dje akusashonnan prinsipal ta trata di un tema ku a ser profundamente diskuti i analisá i sensurá rond dje kilonan di kokaina ku te awe ta tema di diskushon.

A ni mucha di skol no ta tira lodo asina.

Pa loke t’e otro seshonnan di “gewauwel i flouwe kul’ ku tin henter siman for di mainta te anochi na emisoranan lokal, mayoria di hende ya kaba a siña kambia di frekuensia.

E asuntu aki a yega asina leu te ku ayera e konsehero politiko di partido Demokrat a sugeri pa no warda riba e fecha ku Parlamento mester bai kas pa traha lugá pa esun nobo, sino pa purba hasi e kambio aki for di awor. E uniko konklushon ku nos por saka di henter e desaroyo aki ta ku e politikonan ku a lucha pa drenta Gobiernu no a siña nada, pero mas bien a lubida ku nan tin ku duna bon ehempel na lugá di hasi e pueblo aki mas ordinario den nan manera di ekspresá.