Autoridad y respet den husticia ta cuminsa cu dialogo prome cu forsa bruto

Siman tras di lomba a toca topico di material pa Polis y kico ta locual cu candidato Robert Candelaria ta pensa riba esaki. Den su opinion el a duna di conoce cu cualkier material adicional di e pakete di Polis semper ta algo cu tin cu evalua prome. E pregunta tabata si acaso un tazergun lo ta algo cu Polis lo por adkiri den un futuro cercano.

Prioridad ta trece lidersgo y husticia di calidad pa sirbi y proteha nos pais. Segun Robert Candelaria na momento di haci uzo di un arma reglamentario of cualkier otro ekipo ta ora cu e situacion a escala por completo. Ideal lo ta pa usa dialogo pa di-escala un situacion cual semper t’e mihor opcion.

Armanan reglamentario tin cu keda bo ultimo recurso. Candelaria ta afirma cu e no ta contra tazergun pero ta algo cu tin cu investiga prome si e ta apropia den locual cu autoridad tin mester.

Den su opnion, ta mes of mas importante cu Polis haya bon entrenamento cu material/ekipo cu nan tin awor y domina esakinan. Practica ta haci perfecion.