Conteo Electronico anuncia pa CENSO: Lo trece chaos den nos elecion benidero

Segun Gregory Bronswinkel di AVP

Directora di Censo sra. Sharin D. Luydens ta informa e comunidad di Aruba, 70 dia prome cu e eleccion benidero, esta 25 di juni 2021, cu e parti administrativo di e proceso y e contamento di voto lo bay via scanning di stembiljet. Di inmediato preguntanan y duda ta surgi for di e anuncio aki!

E sistema aki SUPUESTAMENTE lo haci e proceso mas liher cual e ta pensa cu lo minimalisa cu bin un INFECCION grandi di Covid como consecuencia di aglomeracion di hopi hende n’e urnanan electoral.

Con ta posibel cu faltando 70 dia pa nos bay urna electoral, ta pensa pa haci un inversion asina grandi pa unicamente 70.750 votador, riesgando nan anonimidad, privacidad y confiansa den henter e proceso electoral?

Dicon ta usa eleccion diripente como motibo di infeccion di Covid? Te cu awe, e ley ta bisa cu si un hende sali afo di e hoki cu su stembilljet habri, nan ta considere esaki di biaha invalido. Awor den e proceso aki e votador lo mester sali di e hoki cu su stembiljet dobla y bolbe habri’e y risca su anonimidad di voto dor cu e mester scan esaki sin haci fout prome cu deposita esaki den e caha. LEGALMENTE ESAKI NO TA REGLA AINDA, segun Gregory Bronswinkel.

Efectividad

Con ta para cu oma di 80 aña cu no sa nada di tecnologia y cu ta yen miedo pa haci fout? Y e votador nervioso cu ta vota pa prome biaha? Nan lo bin vota?

E tecnologia ta haci e votamento aki mas facil of ta haci’e mas dificil?

“Na mi opinion esaki ta complica enbez di facilita e proceso”, Bronswinkel ta comenta. Ta parse cu e chance ta hasta mas grandi pa cu e proceso dura mas largo enbez di mas liher.

Mas duda ta lanta ora bo papia riba e sistema mes. Kico ta pasa si e sistema y e scannernan faya, CRASH of nan hack nan? Supuestamente lo bay manual e ora como redundancy. Inversion grandi y duda den transparencia. Placa perdi?

Con e ta afecta nos anonimidad y confianza den nos eleccion democratico? Y con ta controla y audit esaki pa transparencia total? Si hendenan cuminsa grita fraude, esaki sigur lo trece panico.

Despues di cu e sistema caba di scan, un USB stick lo wordo hiba for di cada urna na Censo pa nan pasa e data over riba un otro computer p’asina conta e total. Pero un hende por cambia e data cu tin riba e USB stick ora cu nan ta hiba esakinan di e urna pa e oficina di Censo? Y kico ta para cu e cahanan di stembiljet? Con nan ta wordo controla awor?

Aspecto Legal

Cuanto ley y decision y cambionan termporario y experimentonan cu stembiljetten nobo, cartchinan pa vota y scanmento digital mester a wordo adapta pa eleccion den Tweede Kamer por a tuma lugar ariba 15, 16 y 17 di maart 2021?

Ki trayecto den Tweede Kamer, Eerste Kamer, y Raad van State tur e leynan y decisionan mester a cana na Hulanda? Esaki ta algo legal? Esaki ta un atake directo ariba EVRM (Europees Verdrag voor de Rechten van de Mens) y e convenio di VN (Verenigde Naties) pa e derechonan civil y politico?

Common sense

Mira nos awor ta papiando riba proceso electoral enbes di papia ariba contenido di programanan di gobernacion pa rescata nos economia. Asina ta trata di secuestra e proceso democratico di votacion y ta trata di reduci e calidad di nos eleccion na Aruba. Ban spera cu esnan responsabel por sa di recapacita nan ideanan y uza nan “common sense”.