Hoben a bolter cu auto di su mayornan y despues a tuma lift bay cas

Diadomingo algo prome cu 10’or di anochi, Polis a wordo manda riba e caminda di Boegoeroei pa Bubali, pa un auto cu lo a perde control y a bolter varios biaha. Mesora a manda un patruya di Polis n’e sitio.

Enberdad nan a bin topa cu e auto, un Hyundai Tucson blauw cu tabata gebolter cant’i caminda y tabata tin hopi daño material.

E chauffeur y niun ocupante tabata n’e sitio mas. Polis a bin compronde cu e ocupantenan y e chauffeur di e auto, kendenan tabata algun hoben, mesora despues cu nan a bolter cu e auto, nan lo a sali for di e auto y a subi den un pickup di un compania conoci y a bay for di e sitio.

Mientras cu Polis tabata haciendo investigacion n’e sitio, un pareha a presenta y a splica Polis cu ta nan yiu a bolter cu nan auto. E mama tabata hopi preocupa pa su yiu y a bisa Polis cu e no ta worry cu e auto, pasobra e auto ta material, e ta hopi mas preocupa cu e salud di su yiu.

Mirando e impacto fuerte y con e auto a keda despues di a bolter varios biaha, e mayornan a dicidi di hiba nan yiu hospital pa un checkeo medico.