Korte a skapa Refineria demanda di US14.5 mion

WILLEMSTAD – E kompania multinashonal C-MCC Worldwide ku tin un base na Kòrsou i otro base na New York, resientemente a pone beslag riba instalashonnan di Isla, pero Korte no a konsedé nan e suma di daño i perwisio ku nan a pidi a rason di 1.5 mion dòler ku te ganashi ku nan lo a hasi si nan a logra bende un lote di petroli ku reportadamente nan a kumpra serka Isla, pero ku despues Refineria Isla Curacao B.V. a bende i entregá na reportadamente Curoil.

Korte no a konsedé MCC pa kobra e plaka ku nan a demanda komo daño i perwisio pero a pèrmiti pa e beslag keda intakto pasobra ora bai mas profundo den e kaso, tin chèns ku nan lo haña rason i e produkto of otro kos di mesun balor mester tei pa nan apoderá di dje.

Kurioso dje kaso ta ku e tin aspekto di un novela di spionahe internashonal di alto nivel ku no sa pasa na Kòrsou.

MCC tin un sede na Kòrsou na Julianaplein 22 i huntu ku Refineria Isla Curacao i PSVSA na 2018 i 2019 nan a negosha riba e posibilidat pa sigi operá e refineria dia e kontrat entre Refineria di Kòrsou i PDVSA  yega su fin dia 31 desèmber di 2019 loke a pasa efektivamente.

Un representante di MCC a papia ku PDVSA riba e posibilidat pa refiná krudo Venezolano den refinerianan na Syria ku e intenshon pa bende i destribui e produktonan refiná na paisnan manera Irak ku intermediashon di Rusia.

MCC a redaktá e kontratnan korespondiente i un dje akuerdonan no-firmá entre MCC i PDVSA dia 21 di mei 2019, tradusí na Hulandes a stipulá cu firmando e kontrat, PDVSA ta ofresé garantia di pago si anula e kontrat di forma prematuro pa entrega di 300.000 barí di krudo ku ta depositá na refineria Isla.

E otro kontrat ta garantisá ku PDVSA ta entregá 2 mion barí di krudo Corocoro for di un haf na Venezuela.

Tin un karta tambe kaminda ta konfirmá ku Refineria Isla Curacao B.V. (“Isla”) a bende MCC Group  N.V. na Kòrsou 300.000 barí i ku for di e momento ei MCC ta doño dje krudo i por traspasá e krudo pa nan filial  MCC Petroleum DMCC.

Refineria Isla a komprometé i ta bai di akuerdo ku eventual benta di e krudo na Curoil entregando e krudo via e pipanan di Isla pa Curoil of kualke otro partido pa su eksportashon for di Kòrsou.

NEGOSHI A DÒL

Dia 29 di aprel 2019 a firma e dokumentonan dje negoshi pero na ougustus di 2019 Merka a proklamá sanshon kontra Venezuela i PDVSA a ninga di firma e kontratnan ku MCC a traha.

Januari ultimo Refineria di Kòrsou i CRU a manda un karta pe kompania di broker MCC konfirmando ku MCC a retirá su mes for di e proyekto.

Ademas ku dia CRU a tuma maneho di e refineria over, PDVSA no a informa nan ku e inventario di krudo ku a sobra na final dje kontrat  ta di MCC.

Isla B.V. aña pasá a hasi hooi esfuerso pa bende e krudo pa por paga su empleadonan i finalmente a logra bende  380.000 barí di krudo ku Engineering& Training Kwi Solutions B.V. ku a eksporta e krudo na ougustus di 2020.

O SEA E KRUDO A ‘FOETSIE’…….

Einan MCC a bira drástiko i a pone beslag riba petroli di Isla provokando ku Refinería di Kòrsou i CRU tambe a pone beslag.

Pero ora pone beslag mester asigná un hende pa warda e petroli pasobra ta kosta i de fakto e suma pa warda e petroli a surpasá 20 mion dòler.

Deurwaarder Ramazan a pone beslag riba òrdu di Refineria di Kòrsou i CRU pasobra e debe pa warda e krudo so kaba a subi na US$ 22,690,986.

MCC dado momento a pidi pa kondena Isla pa paga MCC un suma di  USD 14.505.000 den forma di vorskot forsoso di 20 mion dòler pa ora!

Refineria Isla na su turno a bisa ku e akuerdo ku MMC a firma na aprel 2019 na Caracas no ta válido pasobra ta firma falsu. Ademas MCC no a kumpra e petroli sino a reklamá e petroli komo pago pa otro servisionan ku nan a presta.

Korte a konstatá ku den e fase aki no por konsedé MCC  un vorskot mionario pero ku tampoko por kita su derecho di pone beslag si nan gana e kaso. Di manera ku e beslag ta keda válido i tur dos partido a keda kondená na paga e gastunan dje kaso pasobra basikamente e ta un empate.