MFK no ta bai reunion di Parlamento riba terser tranche finansiero di Hulanda

WILLEMSTAD – E líder politiko di Partido Democraat, Elsa Rozendal a hasi un apelashon riba e partidonan ku a gana elekshon pa asumi nan responsabilidat enfrente e situashon finansiero kritiko di nos pais ya ku sin yudansa di Hulanda, Kòrsou lo kai den un krisis mas pió ainda.

Esaki lo nifiká ku lamentabelmente mas hende lo pèrdè trabou, mas kompania lo sera nan porta i mas hende lo kai den pobresa. I e senario aki nos mester frena ku tur nos forsa. 

Refiriendo n’e deklarashon di lider polítiko di Partido Nashonal, señora Ruthmilda Larmonie, kende deklará ku e ke pa kumpli ku e palabrashonnan ku a hasi ku Hulanda riba e ‘terser tranche’ ku nos a risibí kaba. 

Rozendal ta konkluí ku señora Larmonie ta bon konsiente di e situashon finansiero alarmante ku nos pais i ku mester atendé e leinan pa kumpli ku e ‘terser tranche’.  

Loke Rozendal no ta komprondé ta ku si mester pasa e leinan aki mas pronto posibel pa Kòrsou por sigui haña e sosten finansiero anto dikon MFK, ku  tin representashon Parlamentu aktualmente, no a duna kara i asistí na e reunion di Parlamento i vota na fabor di e leinan aki.

Nos mester ta konsiente kiko e lo nifiká si mañan e sosten finansiero for di Hulanda aki stòp.  

P’esei partido Democraat ta urgi partidonan MFK i Nashonal pa kuminsá asumí responsabilidat i enfrentá e situashon alarmante ku nos pais ta pasando aden i traha realmente pa yega na solushon.