Minister Steven Croes impresiona y yena di gratitud pa personal di Hospital HOH

Diabierna Hospital a ser agradablemente sorprendi pa Minister demisionario di Enseñansa, Cultura, Ciencia y Cultura di nos isla ruman Corsou, esta Minister Steven Croes. E ta actualmente di bishita na Aruba pa motibonan personal y tabata desea di pasa y gradici personalmente Dr. Horacio E. Oduber Hospital y specialmente e personal cu ta trahando incansablemente p’asina brinda un man na pashent di Covid-19 di Corsou.

E ayudo aki di Aruba na islanan ruman den Reino Hulandes a demostra cu trahando hunto pa bienestar di pashent, crece so nos lo sigui crece riba diferente nivel.

Un bishita sumamente agradabel na unda Minister Croes a ser yama bon bini pa Hunta di Directiva di Hospital, Presidente di Asociacion di Specialista hunto cu un team di colega di diferente departamento di cuido.

Na prome lugar a hiba Minister Steven Croes na departamento di Cuido Intensivo na unda e por a tira un bista con tur cos ta cana eyriba y e por a haci diferente pregunta na dr. Benjamin Croes y Manager di ICU, sr. Gino Paskel.

Siguientemente Minister Croes a bay riba piso di cuido Niet Snijdend 2 na unda el a cuminda dos pashent di Corsou cu tabata desea pa gradici’e personalmente. Na mesun momento tur dos pashent a bisa con tremendo e cuido ta cu nan ta ricibiendo na Aruba y a gradici di curason e personal di Hospital di Aruba pa tur loke nan ta haciendo pa nan den e momentonan dificil cu Corsou ta pasando aden.

Por ultimo Minister Steven Croes a reuni un rato cortico cu Hunta di Directiva y algun colega di maneho di HOH na unda sigur a toca tema manera kico mas Hospital di Aruba por contribui awo p’asina brinda alivio na Hospital di Corsou. Pero loke a resalta den e reunion cortico aki ta di ki forma mas nos por traha hunto na beneficio di e islanan teniendo semper e pashent na prome lugar. A ser demostra cu dor di a brinda ayudo na momentonan dificil y traha hunto, crece so nos ta crece como islanan ruman den Reino.