Oficina di FEPO victima di vandalismo

Den weekend cu a pasa fundacion FEPO a ricibi bishita di malhechornan dos anochi tras di otro. A horta algun cos di balor, manera un celular cu FEPO a ricibi como donacion di SETAR y cu tabata uza pa comunica cu nos clientenan cu problema di oido cu no por comunica verbalmente na telefon. Tambe a horta dos otoscoop, cual t’e aparato pa wak den e orea, y algun cos mas di balor. 

Ademas, a horta algun t-shirts di Quota Club Aruba. Esaki t’e t-shirtnan blauw scur cu e miembronan di Quota ta bisti durante Carnaval pa bende earplugs. Un aviso pa comunidad ta, cu si e dianan aki un persona cu un t-shirt di Quota aserca bo pa un peticion di donacion den nomber di Quota Club, sea cauteloso y no honra e peticion aki, ya cu tin t-shirts ta circulando na Aruba cu lo por wordo maluza den nomber di Quota.

FEPO semper a traha duro pa sirbi nos comunidad cu tin problema di oido, como tambe muchanan cu tin dificultad den area di comunicacion.

Actualmente FEPO ta remodelando su oficina pa por brinda un mihor servicio na su clientenan. E ta un lastima cu ta dicidi pa kibra den un lugar na unda clientenan ta atende pa cuido di nan salud y bienestar, y sigur ta spera cu esaki no lo pasa mas.