Politico di MEP a menciona detencionnan di dialuna for di den fin di siman?

Ministerio Publico dor di esaki un biaha mas su credibildiad ta na suela

Mester respeta sin duda Ministerio Publico y henter e aparato hudicial, pero e prome yama pa defende integridad di e institutonan aki, t’e propio Ministerio Publico.

No tur ora esaki ta sosode y esaki ta lanta ainda mas duda ainda ora cu Ministerio Publico lo ta presta su mes pa weganan politico.

Dos siman pasa por ehempel, lider di POR , sr. Alan Howell a haya su mes mey mey di un investigacion relaciona cu maluso di fondonan di e fundacion di POR den Parlemento.

Howell na momento cu el a sali di loke su persona a yama un reunion informativo, ta bin dilanti di algun medio di comunicacion cu Ministerio Publico debidamente lo a mustra cu sr. Howell ta un sospechoso den e investigacion di e caso, pues cu el a wordo interoga ora cu el a presenta na Landsrecherche.

Si enberdad Ministerio Publico a aclaria e declaracion di Howell, tin cu esey no ta trabou di Ministerio Publico pa haci, ya cu mester limita su mes na atende cu e investigacion na lugar di cay coregi manera ta mustra, un declaracion di e lider di POR den prensa.

Awor den fin di siman ta bin resulta cu un miembro di partido MEP, esta Parlamentario Endy Croes, den un declaracion duna den un programa na television di MEP, lo a anticipa cu dialuna mainta dos detencion mas lo bay cay den e caso di Avestruz, esta e caso contra di Benny Sevinger y otronan.

Si esaki ta corecto ta lanta e pregunta con bin cu sr. Endy Croes sa di e detencion aki cu lo tuma lugar dialuna mainta y caminda hasta nomber di esnan cu lo wordo deteni lo a cay.

Si esaki ta corecto, si esaki enberdad ta cuadra cu loke testigonan a informa AWEMainta, anto sin duda tin cu confirma cu Ministerio Publico ta forma mando parti di e campaña politico y cu e situacion cu ta tumando actual den e caso di Avestruz, ta identico na loke e institucion aki tambe a haci den e proceso electoral di 2017 den e caso di Paul Croes.

Si tur e asuntonan aki ta cuadra cu berdad, anto ta di lamenta profundamente e mentalidad politico di un institucion asina serio, cu mester ta serio na tur momento y no forma parti di un campaña politico sea cu ta riba orden di un of otro politico of cualkier otro situacion cu ta lanta duda den e instituto aki.