Wendrick Cicilia otro hoben profesional riba lista di AVP

Capacidad profesional, educacion moral y politico na cas y den organisacion boluntario, energia y motivacion sano y humildad pa sirbi ta loke partido AVP a presenta cu e candidato hoben Wendrick Cicilia diadoming atardi na Cas di Partido y riba medionan social.

Den un discurso cu ta demostra profundidad di pensamento, caracter, moral y dedicacion, Wendrick Cicilia a presenta su mes na comunidad.

E impresion den e sala grandi di Cas di Partido y tur rond di media social tabata WAW!!!! Ta unda e hobennan aki a siña y crece pa bira e ciudadanonan capacita y cu un gana di sirbi nan pais asina?

“Fuerte, cla, decidido y decente”, “nos kier mas di hobennan asina” y “AVP tin un fuente amplio di profesionalnan cla pa sirbi nos pais. Esaki ta loke Bo ta yama organisacion di base”. Asina algun hende a expresa nan mes riba medionan social. Cu un palabra: impresionante!

Ken ta Wendrck Cicilia?

Wendrick Cicilia ta un hoben, un di dos ruman morocho, cu ta bin di un famia grandi y un tradicion di hopi generacion den Partido di Pueblo Arubano AVP. Wendrick mes a conta cu e tabatin problema pa caba scol basico, pero awe ta un hurista profesional gradu’a di Universidad di Aruba.

E tin 25 aña. Banda di cu el a lanta den un famia cu tabata envolvi den activismo politico pa hopi aña, Wendrick mes a bira miembro di Plataforma Hobennan Profesional (PHP), un organisacion di hobennan den partido AVP.

Hunto cu su coleganan di el a lanta Tienda di Ley Aruba, cu ya pa algun aña ta duna sosten legal na ciudadanonan di menos recurso cu no por paga un abogado. Banda di su estudio na universidad, den e trabou di Tienda di Ley, e y su coleganan di PHP a haya hopi experiencia den asuntonan legal diario di ciudadanonan na Aruba.

AWOR TA TEMPO PA HOBENNAN

Sin descalifica niun hende, Wendrik a haci bon cla cu hobennan profesional ta cla pa carga e responsabilidad cu nan generacion tin pa nan pais.

Wendrick: ”Cada generacion nobo tin un responsabilidad pa cu su comunidad. Como hoben profesional cu conviccion y determinacion, mi ta convenci cu nos tempo ta Awor!”

Pa ilustra su intencion den politica Wendrick a splica con e ta wak politica: “Politica ta mas cu un metodo pa eherce y conserva poder, mas cu administracion di poder den un pais y sigur mucho mas cu un instrumento di critica, husga y condena.

Den mi curason mi tin e conviccion cu politica tin un defincion mas profundo. Politica t’e lucha pa felicidad humamo, e lucha pa crea of recupera prosperidad y felicidad pa cada cuidadano, y mas aun p’esnan mas vulnerabel den nos comunidad.

E t’e lucha continuo pa crea un mehor sociedad. Pa crea e condicionnan necesario pa cada cuidadano por florece y hiba un bida digno”. Ta obvio, Wendrick a bin pa sirbi su cas, Aruba!