240 Remedi kita for di lista positivo

Ta for di december aña pasa AZV a anuncia cu lo tin cambio den su lista di remedi cu lo mester a tuma lugar dia 1 di februari. Awe nos ta practicamente na di april. Pesey Solange Tchong a declara cu ta prudente pa duna un splicacion p’asina prepara e aseguradonan riba con nan por prepara na momento di bay dokter, pero tambe ora di bay botica.

Fuera di Solange Tchong, dr. Joost Samuels y su colega drs. Marapin a duna splicacion amplio di AZV su decision.

Tin cu puntra bon bo dokter di cas, kico exactamente e ta receta e pashent. Solamente cerca cierto indicacionnan AZV ta cubri e remedi.

Tambe ta importante cu ora cu referi na un remedi cubri pa AZV, e dokter mester scirbi e codigo riba receta, cual AZV lo reconoce y cubri.

Tambe tin e opcion pa ora bay botica pa puntra un biaha mas riba e remedinan cu a haya. Tin hopi di e remedinan cu aworaki a bira e categoria di cuido propio.

E lista positivo ta uno dinamico. Tur luna Advies Commisie Geneesmiddelen Aruba (AGA) ta evalua e lista aki y segun desaroyo, ta adapta e lista. Esey ta nifica e lista aki ta revisa y adapta tur luna, segun drs. Marapin. Loke a sosode di 1400 remedi cu tin riba e lista, a kita 240 remedi, di cual mayoria a bira di cuido propio. Tambe tin 50 remedi of substancia activo cu a bay p’e criterionan.

E remedi di cuido propio a kita fo’i dje lista. Tambe tabatin remedinan bieu y no tabata disponibel mas na Aruba. Tabatin remedinan cu tabatin alternativa pa nan y un lista di criterio cu tin 40 pa 50 remedi riba dje. E remedinan aki por uza nan pa malestarnan specifico.

E remedinan cu no ta riba e lista positivo por cumpra nan sin receta, segun decision di AZV.