A inverti 321 miyon florin den FASE y Loonsubsidie

Dentro di poco tin eleccion y esey t’e motibo dicon opositornan politico ta trata na trece informacion incorecto pa dilanti. Na momento cu Aruba a wordo confronta cu e pandemia, Gobierno a percura pa presenta un presupuesto cu diferente programa di alivio p’esnan mas afecta. Asina a brinda entre otro FASE, Loonsubsidie y tambe ayudo financiero na comerciantenan medio grandi y chikito den e forma di 4 mil florin pa kwartaal, segun Rocco Tjon, lider di fraccion di MEP.

321 MIYON FLORIN NA FASE Y SUBSIDIO DI SALARIO

Presupuesto 2020 tabata den su concepto e presupuesto di mas importante. Pasobra aki a brinda hopi famia asistencia financiero. Lamentablemente ni aki AVP por a mustra madurez politico y nan NO a vota na fabor di e presupuesto.

Te cu februari 2021 tin casi 12 mil persona a wordo yuda dor di FASE. Esaki ta suma un total di 50 miyon florin. Y pa loke ta Loonsubsidie t’asina cu 1500 compania a haya e ayudo aki, p’asina 18 mil trahador por a keda cu nan trabou. Y esaki a suma un total di 271 miyon florin.

AVERAHE DI 4000 PERSONA PA LUNA TA HAYA FASE

E programa di FASE ta yuda tur luna un averahe di 4000 persona. Y e ayudo aki ta pa comerciante independiente sin trahador y trahador. Tambe a incorpora e grupo di taxista, buschaufeur, y nos artistanan local den e programa. Asina a trata na alivia e impacto un poco pa nan tambe.

Dor di e situacion cu a presenta y e programa di FASE a bin ta realisa cu mester tin un “vangnet sociaal” mas moderno y mas eficiente. Y p’e motibo aki Minister Glenbert Croes a introduci e programa “Tijdelijke Inkomen Ondersteuning”.

PA CONCLUI

FASE ta un programa cu a wordo realisa danki n’e pueblo di Aruba. Esaki no ta a base di e fiansa haci cerca Hulanda. Como pais nos ta para dilanti retonan grandi y tur politico mester mustra madurez politico aworaki.

Segun Rocco Tjon, nan ta spera cu tur Parlamentario lo aproba presupuesto 2021, p’asina por sigui brinda ayudo na tur famia.

Gabinete Wever-Croes a hiba un maneho responsabel prome cu e pandemia y durante e pandemia. Y esaki lo t’e manera cu Gabinete Wever Croes II lo sigui goberna despues di 25 di juni 2021.