Aparato hudicial mester di determinacion pa trece trankiliad y elimina corupcion

E pueblo mester tin e confiansa den e institucion y ta sigur cu husticia ta uno imparcial, ta locual cu Robert Candelaria di partido AVP a laga sa. Husticia no por ta den un situacion cu pueblo ta cuestiona si acaso ta faborece partidonan politico of personanan liga n’esakinan. Ta locual cu ta tumando lugar e ultimo añanan y a lanta e desconfiansa den e pueblo votador.

Pueblo ta cuestiona si nos sitema ta funciona. Robert Canelaria ta enfatisa cu tin cu investiga. Si ta culpabel, mester haya castigo. Pero si un persona no ta culpabel, e mesun investigacion ey lo mester mustra cu e ta inocente. Ta di sumo importancia e legitimidad di e institucion, caminda pueblo tin cu haya e garantia cu husticia riba nos isla ta limpi, imparcial y plenamente confiabel.

Robert Candelaria ta sigura cu lo traha riba investigacion, pero principalmente riba e imagen di husticia p’e ta bek caminda e ta supone di ta.