Conteo Electronico di Voto: Ta hole na robo electoral

“Ami ta kere den potlood cora y papel” ta prome comentario cu a resona despues di anuncio di Gobierno di MEP cu lo bay haci conteo di voto electronico.

Hopi ta expertonan na mundo cu ta cuestiona votacion electronico y conteo electronico di votonan durante eleccion.

Varios pais cuestionabel na mundo a haci uso di e tipo di tecnologia aki p’asina afecta e resultado di eleccionan rond di mundo.

E recien anuncio di Gobierno demisionario di MEP cu Aruba lo bay haci conteo di Voto Electronico no a cay den bon tera serca hopi ciudadano.

“Absurdo y inecesario”, “hopi placa cu no tin awor p’e computernan”, “asina cortico prome cu eleccion?”, “Ken ta garantisa un proceso transparente”?, ta preguntanan cu di biaha a surgi ora cu Directora di Censo cu aprobacion di Minister Presidente Evelin Wever Croes a anuncio cu Aruba ta bay over n’esaki.

Pa un poblacion di voto di 60.000 hende cu ta vota, pakico inverti asina hopi placa den un sistema siendo cu tur tempo Aruba a vota manual!

Ta usando eleccion di Curacao como rason y motibo di brote di Covid y pesey kier bin cu esaki Aruba. Con ta splica brote na Colombia, aña pasa na Aruba ora NO tabatin eleccion? Paisnan cu no tabatin eleccion, con bo ta splica e brote na a paisnan aki? Dicon implementa algo asina esencial y democratico di un dia pa otro bou di escusa di un pandemia cu ya a dura mas di un aña caba?

E siguiente puntonan aki mester haya contesta:

* Con bo ta garantisa mi anonimidad di mi voto si mi mester habri e envelop y scan esaki?

* Cuanto placa e cos ki ta costa Aruba (Gobierno)?

* Ta usa pretexto di brote di Covid despues eleccion di Curacao pa introduci’e na Aruba? Pero con ta splica brotenan den otro pais of anteriormente na Aruba mes sin cu tabatin eleccion?

* Pakico hiba un USB stick for di un Urna pa Hoofdstembureau den un forma Fisico, si juist kier digitalisa e proceso?

* Ki garantia tin cu e USB no ta wordo manipula of cambia?

*Pakico asina un urgencia? Si por pone reglanan di DVG na tur urna?

E hecho ta cu simplemente nos comunidad no ta confia ni e sistema ni e proceso. Pueblo ta mira su voto sagrado y anonimo. No mishi cu esaki!