Maestra di scol Otami Thomasia kier yuda alivia e situacion dificil cu pueblo t’aden

Ayera nochi, a tuma lugar otro presentacion di un candidata nobo cu lo bay riba lista di partido AVP pa eleccion di dia 25 di juni proximo.

Ta trata aki di Otami Thomasia, kende ta maestro di scol y ta conta cu 34 aña di edad y ta trahando pa algun aña caba den enseñansa na Pieter Boer College.

Su decision pa drenta politica y duna un man na desaroyo general di e pais, a surgi despues di a mira tur locual nos isla y nos cuidadanonan ta pasando aden diaramente, no solamente dor di e pandemia di ultimo aña, pero tambe pa falta di un maneho adecua di un Gobierno cu no tabatin vision.

Sin duda na momento cu pueblo tin un Gobierno cu no por cumpli cu tur loke el a priminti di duna pueblo, cu no por a ehecuta e desaroyo cu tanto el a sigura cu e lo percura p’e, ta surgi situacionnan di incomodidad y di hopi problema pa tur hende.

No solamente cu e Gobierno cu pueblo tabatin confiansa cu e lo bay atende cu tur asunto di henter pueblo, a impone cantidad di medida cu a hinca hopi famia den un situacion financiero hopi delicado.

Otami Thomasia ta mustra cu el a sinti un necesidad grandi pa sali afo, di bay duna un man pa  yuda y sostene tur hende cu tin mester di ayudo, mirando e sitaucion den cual e pais a keda n’e momentonan aki.

“Aruba ta sclama pa ayudo y mi ta kere cu sigur mi persona lo por fungi pa duna un aporte grandi y valioso pa logra un miho bienestar pa nos pueblo. 

Aruba mester di hendenan cu ta pone man na obra den e tempo dificil aki, cu kier yuda den e proceso di rescata un pais cu ta den crisis serio y mi persona ta sinti cu mi compromiso ta cu mi pueblo y pa e motibo aki tambe , mi a tuma e decision di drenta e arena politico y pa uni mi mes cu partido AVP.

Den pasado AVP ya  a demostra cu semper nan a hiba nos isla padilanti, a percura pa un desaroyo progresivo, caminda tur hende ta conta y esaki lo no ta prome biaha cu AVP lo ta dilanti otro reto grandi asina aki y manera semper como partido, AVP  semper a percura pa cumpli cu necisidadnan di pueblo.

E vision di AVP, e determinacion pa semper sirbi interes di pueblo, ta tur locual cu mi tambe  haci y semper mi ta haci’e cu amor, pasion y dedicacion.

Mi ta mayor, mi ta maestra, mi ta deportista, mi ta coach y na mes momento un “influencer”. 

Awor den mi carera politico cu partido AVP, lo mi para pa igualdad den formacion social, den enseñansa y den desaroyo economico pero na mes momento nos lo busca tambe solucion practico pa duna deporte su balor berdadero,  cual sigur lo aporta na bienestar di un desaroyo sano di y pa nos hubentud.

Ban uni y enfrenta e crisis aki como un pueblo Arubano uni bou di un gobernacion responsabel, manera semper partido AVP a duna pueblo,” Otami Thomasia a declara ayera nochi. 

El a termina mustrando cu “Otami’s on e mission with a vision.”