Partido AVP a presenta un candidato nobo den nomber di drs. Sharon Erasmus van der Linden

Sharon a gradua for di Colegio Arubano VWO pa después a sigui cu su estudio na Hulanda y a termina esaki cu éxito como drs. den “Bedrijfskunde voor de financiele sector” na Vrije Universiteit Amsterdam. E logro aki tabata un meta cu Sharon, desde di un edad jong, a pone pa su mes.

Después di su estudio Sharon a traha na Rabo Securities caminda e el a hana amplio experiencia den e sector di finanza. Pero su gana pa duna un aporte bek na su país, a pone cu na aña 2000 Sharon a dicidi pa regresa Aruba y a asumi e posición como Tesorero di Aruba na Departamento di Financien. Den e posición aki e tabata responsable p’e maneho di liquidez di país Aruba. Aki el a hana hopi experencia y conocimiento pa cu e retonan financiero cu un país den ful desaroyo económico tabata enfrenta. Den e funcion aki tambe el a fungi come Director suplente di Departamento di Finanza y a lidera varios biaha e proceso di rating di país Aruba, dor di e agencia nan di rating y IMF, cu bon resultado.

Na 2004 Sharon a dicidi tuma un reto nobo den sector priva caminda el a asumi entre otro e encargo di Corporate Account Executive na un banco comercial. Después di esaki el a dicidi pa cuminsa riba su mes como consultant pa yuda inversionista y desaroyadornan. E periodo aki a dune hopi experiencia den e reto nan cu hopi inversionista y desaroyadornan local y internacional ta confronta den e mercado local. E experiencianan aki, a stimula Sharon pa pensa y propone solución nan cu por haci e caminda pa e gruponan aki por establece nan mes mas facil, transparente y liher.

Na ana 2009 su experticio a wordo solicita un biaha mas pa yuda y contribui cu su ideanan pa traha den e Policy Document di e Minister di Economía. Den e proceso aki el a juda pa set up Aruba Investment Agency (Arina) cu tabatin e tarea pa asisti y guia negoshi, inversionista y desaroyadornan pa establece na Aruba. E meta principal tabata pa contribui n’e desaroyo económico di Aruba. Sharon a fungi como Director di Arina pa varios aña.

En corto, drs. Sharon Erasmus van der Linden tin un trayectoria amplio di conocimento y experencia riba e tereno di finanza, economía y inversión den sector publico y priva. P’e motibonan aki Sharon a haye necesario pa uni su mes n’e Team di AVP pa enfrenta e retonan cu Aruba tin su dilanti y asina recupera nos economía dor di diversificación cu desaroyonan económico sostenible y unda tin oportunidad pa un y tur.