Prolongashon di akuerdo pa FOL na Hato no ta kumbini Kòrsou

WILLEMSTAD – E desishon pa ekstendé e akuerdo ku 5 aña mas ta un desishon ku no ta na interes di Pueblo di Kòrsou, mirando ku aktualmente tin un urgensia haltu pa krea mas kupo di trabou na Kòrsou.

Segun sifranan di Ofisina Sentral di Estadístika (CBS), mas ku 50% di nos poblashon riba 15 aña aktualmente no tin trabou.

Ta bin aserka ku Fondo Monetario Internashonal (IMF) a pronostiká ku e aña akí e debe di Gobièrnu di Kòrsou lo krese di 55% di nos produkshon nashonal (‘bruto binnenlands produkt, bbp) te na 100%.

Ta trata aki di un debe nashonal ku por surpasá 4.2 miar florin na 2021.

Den e mundu post Covid, komersio elektróniko, e-commerce, lo sigui krese.

E nesesidat pa kompanianan manera Amazon, Alibaba, Watmart, Bol.com i otronan establesé puntonan stratégiko internashonal pa distribushon rápido di nan merkansia (hùb logístiko), tambe ta bai krese.

P’esei mes Kòrsou mester probechá mihó di su posishon geográfiko pa desaroyá su potenshal komo un hùb logístiko pa akomodá e tipo di kompanianan ariba menshoná na lugar di kontinuá ku un base sin benefisio pa desaroyo di nos país.

Lokual FOL ta i ku ta sirbi únikamente komo ‘limpiadó di stupi’ di Estados Unidos i Hulanda pa loke ta trata tráfiko di droga òf otro agèndanan destiná p’e paisnan akí ku tur e konsekuensianan negativo mará n‘esaki pa nos imágen i desaroyo ekonómiko. Ta kico ekonomia di Kòrsou ta gana ku e informashon ku entre 2018 – 2019 e buelonan di FOL a konfiská 280.000 kilo di kokaina i 24.000 kilo di mariwana?

Droga ku no ta ni destiná pa merkado di Kòrsou.