Sin nunca e caso a keda sera, OM ta anuncia cu Investigacion di asesinato di Poentje Castro a start di nobo

Ya ta diez aña pasa cu Aruba a keda geshock dor di asesinato di periodista di television John Anthony ‘Poentje’ Castro. Te dia di awe no a detene ningun sospechoso p’e asesinato aki.

Recientemente un team di Cuerpo Policial di Aruba, riba peticion di Ministerio Publico, a traha riba un revision (review) di e investigacion aki cu ta carga e nomber di “Apollo”.

E revision a hiba na puntonan di referencia concreto pa mas investigacion, a base di cual a keda dicidi pa start e investigacion di nobo.

Den e periodo benidero lo traha cu dedicacion na activamente scucha testigonan cu por aporta na soluciona e caso.

Ademas Cuerpo Policial di Aruba y Ministerio Publico ta convenci cu tin hende cu tin conocimento di e caso, pero cu te ainda no a papia nada.

Un yamada urgente ta bay na personanan cu tin conocimento tocante e asesinato di Poentje Castro, of cu sa kende(nan) a comete e asesinato aki, pa meld nan mes. Por meld anonimamente via tiplijn 11141.