Universidad di Aruba ta felicita drs Madhu Jadnanansing cu su titulo di Doctor (PhD) den Management Sciences

Dia 9 di april 2021 ultimo, drs. Madhu Jadnanansing RA, a defende su PhD disertacion cu exito dilanti su Comite cu a consisti di professor sr. DiPietro, profesor dr. Martin, Associate Professor, dr. Kubickova, Assistant Professor dr. Kim, tur 4 di University of South Carolina,  Estados Unidos, y dr. Kibbelaar (IPA) y dr. de Droog (University of Aruba) di Aruba.

Profesor DiPietro recientemente a inaugura como hoogleraar na Universidad di Aruba y ta guia e programa di “research” como tambe e candidatonan di PhD na Facultad di Hospitality and Tourism Management Studies (FHTMS).

Profesor DiPietro y su coleganan di University of South Carolina ta duna algun curso den e programa di MBA di FHTMS y ta guia studiantenan di MBA cu nan tesis. E titulo di e disertacion ta “Female Leaders in the Aruban Lodging Industry: An Exploratory Study of Perceptions of Second-Generation Gender Bias.”

Den e studio a investiga e efecto multi-contextual di “second-generation gender bias” riba avanse di carera di hendenan muher den e sector hotelero. Den e estudio a inclui hendenan muher ehecutivo den sector hotelero cu ta ocupa e dos nivelnan di posicion mas halto den e hotel pa investiga nan percepcion tocante e experiencia y efectonan di “implicit bias”.

Universidad di Aruba y muy especialmente e studiante y coleganan di Facultad di Hospitality y Tourism Management Studies (FHTMS) ta felicita dr. Jadnanansing cu e logro aki. Facultad di Hospitalidad y Turismo di Universidad di Aruba ta reconoce e contribucion unico y strategico di e industria di turismo p’e desaroyo di Aruba y Caribe. Pa mas informacion di nos programa por bishita nos na www.ua.aw of via facebook @UA.FHTMS