Asina tin repartishon di herensia, tin problema

WILLEMSTAD – No ta tur problema ta di karakter violensia fisiko, hopi biaha nan ta di karakter sivil ku mester resolvé di manera sivilisá.

I ta p’esei nos pais tin Korte di Hustisia ku ta resolvé kasonan penal, pero kasonan sivil tambe manera d’esun riba repartishon di herensia.

Dia 4 di mei proksimo e tribunal sivil di nos Korte Komun di Hustisia mester interveni den un kaso asina kaminda un dje partinan ku a toka e suerte di hereda un kas di su difuntu, mester deklará si e por of ta dispuesto di komparti parti dje balor dje kas ku e otro herederonan dje difuntu kasá.

Dia 4 di mei tantu e viuda komo e herederonan lo tin di kontestá ún pregunta di Hues: Si e herederonan keda ku e kas, si nan a dispuesto di duna e viuda su parti di balor dje kas.

E herederonan no a duna kontesta riba e pregunta aki na notario si manera ku awor ta surgi e otro pregunta: Si akaso e viuda haña e kas komo herensia, e lo ta dispuesto pa paga e herederonan e diferensia ku ta toka nan.

E herederonan a informá apoderado dje viuda kaba ku nan no ta interesá den interkambio di dokumento dilanti Hues i ke pa Hues mes tuma un desishon mesora den su veredikto.

E señora no tin nodi di paga abogado, pasobra for di 5 aña pasá e tin un dekreto ministerial ku ta duné e privilegio di por prosesá gratis.

E herensia ta un kas ku tereno propio sin tene na kuenta sobrá dje herensia dje difuntu.

E trio di heredero por haña e kas pa 175.000 florin for di kual nan lo mester duna e viuda 40.000 florin.

E viuda a ekspresá su deseo pa é heredá e kas den kual kaso e ta dispuesto di paga e yunan dje difuntu un suma di 135.000 florin, o  sea mesun kondishon ku e tres yunan lo a haña e kas.