Doño di negoshi di pisina a gana kaso di belasting kontra Inspektor

WILLEMSTAD – Tin un dicho ku ta bisa “…un bon areglo ta mihó ku un bon pelea….” pero tin biaha sin situashonnan den bida ku un siudadano mester bai gera pa haña rason di su banda i e lugá adekuado pa esei ta Korte di Hustisia.

Loke ta tuma lugá den sala di Korte t’e reflekshon mas verídiko kiko ta pasa den komunidat i ta un berdadero registro di bida kotidiano den nos pais.

Un kaso asina a pasa poko dia pasá ora ku un siudadano ku su negoshi ta pa eksplotá pisina den forma komersial a hañ’é den un diferensia di opinion ku Inspektor di Belasting.

E pisina tabata den un NV, pero na aña 2016 den luna di ougustus ku ta oktavo luna di aña fiskal, ela konvertí e NV den un BV silensiosamente.

Den su aangifte di Inkomstenbelasting el a konta e ganashi ku el a hasi den e promé 8 lunanan di e aña i sobrá ela registrá den su BV.

Sinembargo Inspektor a dal e ku un aanslag di winstbelasting riba henter aña.

E kabayero a aktua di moda sivilisá i a bai buska rason serka Hues i ‘voilá’: Hues a duné rason!

Korte no a haña ku e komersiante a uza e ganashi dje kuater lunanan pa uzo personal.

Belasting a kobr’é belasting riba un entrada di Naf. 138.023 riba aña 2018  riba kual e mester a paga Inkomstenbelasting, prima sosial i seguro mediko.

Ora el a reklamá, Inspektor a pone su reklamo un banda. E kabayero a bai Korte i luna pasá e tabatin su dia den Korte.

Einan el a protesta pasobra el a haña ku Inspektor a kobr’é ganashi riba un entrada muchu haltu.

El a pidi pa baha e suma riba kual e mester paga belasting ku NAf 54.314 pero Inspektor a ninga.

Hues a hasi loke e Inspektor mester a hasi pero a faya di hasi i a orden’é pa proba loke e ke kobra e empresario.

Komo ku e Inspektor no por a proba ku e empresario a hasi mas ganashi ku el raportá, el a pèrdè e kaso. Por lo tantu Hues a dikta ku Inspektor di Belasting por kobr’é prima riba e suma di  NAf 83.709 ku ta e resultado finansiero korekto dje negoshi di pisina.