Exigencia di admision (toelatingseisen) na Colegio Arubano, di MAVO 4 pa HAVO 4

Recientemente a sali un comunicado tocante e exigencianan di admision na HAVO 4 di Colegio Arubano p’e alumnonan di MAVO 4. Eroneamente a informa cu exigencianan ta mas estricto. Esaki no t’e caso.

E exigencianan di admision ta igual n’esan di aña pasa. A indica cu no lo admiti alumno sin 8 pa Wiskunde. Esaki no ta cuadra!

Loke si t’e caso ta cu pa un alumno scoge Wiskunde B, mester tin 8 pa Wiskunde na MAVO.

Sin Wiskunde B ainda e alumno por scoge un profiel cu e materianan cu nan a gradua cu nan na MAVO. Pues, no t’asina cu ta limita e alumnonan den nan escogencia.

E insinuacion cu e alumnonan lo por trata e materia di Wiskunde den un siman tampoco ta cuadra. Di otro banda, e sugerencia pa organisa un curso di Wiskunde den vakantie ta hopi bon. Nos tambe ta para tras di esaki y hasta a haya acuerdo pa haci esaki, pero debi n’e situacion financiero di e isla, no ta posibel pa financia dicho curso.

Tin pregunta tocante e profielnan cu Colegio Arubano ta ofrece. E alumnonan cu ta cumpli cu e exigencianan di admision por scoge e mesun materianan cu nan tabatin na MAVO.

Nos ta guia e alumnonan cu ta bin di MAVO cu e medionan cu nos tin. Nos ta conta cu mentor special pa e alumnonan aki. Banda di esaki, nos kier ofrece les extra di guia, pero desafortunadamente nos no tin ni ora, ni docente p’esaki.

Ta duel nos hopi cu a surgi un inkietud. Contrario n’e pensamento reinante, Colegio Arubano semper ta cla pa ricibi alumno procedente di MAVO.

Si ainda tin cierto inkietud, rectorado y directiva semper ta disponibel pa contesta tur pregunta, segun Directiva y Rectorado di Colegio Arubano