No tin excepcion pa ningun casino bay limita operación, sino lo rectracta permiso

Minister di Husticia mr. Andin Bikker, kende ta encarga cu asuntonan di casino, ta lamenta cu Parlamentario sr. Marlon Sneek a malinforma y crea un impresion comofisuera cu Gobierno lo a otorga un permiso special pa un casino na un hotel: Tur casino-vergunning ta standard concipia pa Departamento di Asunto Huridico y den e permisonan ta para standard e tipo di weganan cu ta usual den un casino, p.e. bankcraps, wega di carta, roulette, wheel of fortune, bingo of keno, y weganan special gekeur.

Gobierno no lo permiti pa ningun hotel cu tin permiso pa casino bay malusa un casino-vergunning y bay purba limita esaki na weganan di machin, ya cu esey lo no wordo considera un casino conforme e permisonan.

Aruba ta un destinacion turistico renombra cu ta competi cu otro destinacionan cu tin casino como un atraccion den hotel, y pues tin pa mantene un standard halto: Ora ta papia di casino, ta casino kiermen, no un ‘gamehal’ chikito.

Dus al contrario cu e impresion cu Parlamentario Sneek kier a crea, no ta existi ningun permiso special pa casino, tur casino vergunning ta standard traha dor di Departamento di Asunto Huridico conforme maneho y modelo estableci pa hopi aña caba, y Gobierno no lo permiti ningun vergunninghouder bay desvia di e naturalesa y e intencion tradicional di permiso pa habri casino. Sino lo por yega na retracta un permiso.

Ayera mainta Minister di Husticia Andin Bikker y Minister Glenbert Croes di Asunto Social y Labor a reuni cu representantenan di Sindicato FTA pa subraya cu Gobierno ta para banda di e clase trahador a base di maneho estableci pa hopi aña caba y no lo permiti pa ningun hotel cu tin permiso pa casino bay malusa un casino-vergunning: casino kiermen casino cu weganan tradicional, punto.