A entrega carta na Gobernador pa para intento di fraude electoral

Ayera mainta lider di partido AVP, Mike Eman hunto cu e lider di fraccion di AVP den Parlamento, Marlon Sneek, a efectua un bishita na Gobernador Alfonso Boekhoudt, caminda den nomber di partido AVP, a entrega un carta relaciona cu loke e partido ta considera, un intento pa fraude electoral.

Na su salida for di e reunion cu Gobernador, Mike Eman a dirigi su mes na medionan di comunicacion presente mustrando cu partido AVP tin un preocupacion grandi pa loke ta situacion caminda un Gobierno demisionario n’e momentonan aki, practicamente ta den un proceso di intento di un fraude electoral.

Un di e cosnan mas grandi di democracia di un pais por tin, t’e legitimidad cu e ta haya for di un proceso electoral husto, un proceso electoral transparente y confiabel e lider di AVP a mustra.

Sr. Eman a sigui mustra cu Aruba por wak bek den su historia di mas di 60 aña di eleccionnan liber, caminda resultadonan hopi bes por varia contrario n’e perspectiva hendenan tabatin, pero semper tur hende a biba cu e confiansa grandi den e resultado e dia despues di un eleccion, caminda semper gana of perde, victorianan grandi, pa otronan derota, pero pueblo semper a mira e proceso como uno confiabel, ya cu e ta un proceso habri y transparente, caminda comunidad por conta e votonan y por a mira cu e conteonan aki, pa medio di representantenan di nan parti den e proceso aki, durante di e conteo di voto.

Sinembargo e pensamento di bay introduci un sistema di scanning di e voto, apenas algun siman prome cu eleccion, ta algo absurdo, pasobra pa hopi e lo ta algo cu nan tin cu bay siña ainda con pa haci esaki y esaki lo bay crea un inkietud grandi cerca den comunidad e lider di AVP a mustra.

E cambio aki no tin ningun balor adicional ya cu e hecho cu tin cu vota den e sistema tradicional y despues tin cu pasa esaki dor di un scanner, hustamente lo bay haci e proceso ainda mas largo y si ta papiando en relacion cu e situacion di Covid p’e proceso cana mas liher, e proceso di scanning aki a bay alarga e proceso.

Aruba no por bay permiti su mes n’e momentonan aki pa bay experimenta cu e sistema democratico di eleccionnan confiabel cu semper tabata existi, AVP no ta kere cu c’un Gobierno demisionario por bin cu leynan di e embergadura aki n’e momentonan aki.

No solamente e Gobierno ta demisionario, pero ta un Gobierno cu ningun hende sa e mayoria cu e Gobierno aki ainda por tin despues di tur desturbio interno den e coalicion, pues e no tin ningun base di apoyo formal y tampoco moral  pa cana e caminda aki.

AVP ta sigur c’un Gobierno cu ta sinti cu pueblo ta cla pa manda nan cas y den un forma abrumador, awor kier haci un intento di fraude electoral cu AVP lo no bay permiti.

E lider di AVP a mustra cu a pone esaki bon cla na Gobernador, cu AVP cu tin e fraccion mas grandi den Parlamento, cu t’e partido mas grandi na Aruba y si kier cambia sistemanan di votacion, e ora tin cu haci esaki luna of añanan largo, pa tur partido duna nan aprobacion na cambionan electoral.